Bugun O‘zbekiston MTJ Eron bilan o‘ynaydi

Bugun, 18 noyabr kuni O‘zbekiston milliy terma jamoasi BAAning Al-Ayn shahrida bo‘layotgan xalqaro o‘rtoqlik turnirining finalida Eronga qarshi bahs olib boradi. Uchrashuv “Hazza bin Zayd” stadionida Toshkent vaqti bilan soat 21:00 da start oladi.

Fabio Kannavaro boshchiligidagi O‘zbekiston terma jamoasi joriy yilning 14 noyabr kuni Muhammad Saloh yetakchiligidagi Misr terma jamoasini 2:0 hisobida mag‘lubiyatga uchratib, finalga yo‘l olgan bo‘lsa,  Eron Kabo-Verdeni penaltilar seriyasida mag‘lub etib, finalga yetib kelgan edi.

Shu kunga qadar bu jamoalar o‘zaro 18 marta bahs olib borgan. Uchrashuvlarning 11 tasida Eron, 2 tasida O‘zbekiston g‘alaba qozongan, yana 5 ta o‘yin durang bilan yakunlangan. Jamoalar o‘rtasidagi ilk uchrashuv 1998 yilgi Osiyo o‘yinlari doirasida bo‘lib o‘tgan va unda Eron 4:0 hisobida zafar quchgan edi. Terma jamoalarning eng so‘nggi o‘zaro bahsi esa joriy yilning sentyabr oyida Toshkentda bo‘lib o‘tgan CAFA kubogi finalida kuzatilgan. Mazkur bahsda O‘zbekiston milliy terma jamoasi 1:0 hisobida g‘alaba qozongan edi.
 
Turnirning 3-o‘rin uchun kechgan bahsida Misr Kabo-Verde ustidan penaltilar seriyasida g‘alaba qozondi.

Eslatib o‘tamiz, avvalroq O‘zbekiston milliy terma jamoasi bosh murabbiyi Fabio Kannavaro ushbu turnir uchun jalb etilgan futbolchilar ro‘yxatini e’lon qilgan edi.