“Bu rahbariyat qarori”. Simeone Alvaresning holatiga izoh berdi 

“Atletiko Madrid” jamoasi bosh murabbiyi Diyego Simeone La Liganing ikkinchi turida “Vilyarreal” bilan durangdan (2:2) so‘ng hujumchi Xulian Alvares bilan bog‘liq vaziyat haqida fikr bildirdi. 

Uchrashuvdan so‘ng 26 yoshli argentinalik futbolchi jamoadoshlari bilan birga muxlislar oldiga bormadi va darhol yerosti yo‘lagi orqali kiyinish xonasiga yo‘l olgandi.

“Klub menga uni tribunalar va muxlislardan uzoqroq tutish haqida qaror qabul qilinganini aytdi. Klub uni muxlislardan ajratib, kiyinish xonasiga borishi uchun uzoqroq olib ketishga qaror qildi”,  deydi Simeone.

Murabbiy Alvaresning ruhiy holati haqidagi savollarga batafsil javob berishdan bosh tortdi. Shu bilan birga, u jamoani birdamlikni saqlashga chaqirdi.

“Men Xulian haqidagi barcha savollarga javob bermayman. Menimcha, buni yetarlicha aniq aytdim: biz birga bo‘lishimiz kerak. Biz birga bo‘lganimizda, katta natijalarga erishishimiz mumkin. Bizga hujumchilar kerak. Bizda ular bor va biz ularga g‘amxo‘rlik qilishimiz kerak”,  deya qo‘shimcha qildi Simeone.

Eslatib o‘tamiz, avvalroq Xulian Alvares bu mavsumda jamoa safida ilk o‘yinida muxlislar tomonidan tanqidlarga uchragani haqida xabar berilgandi.