“Атлетико Мадрид” мухлислари Альваресни ҳақорат қилди

Кеча, 23 август куни “Атлетико Мадрид” ҳужумчиси Хулиан Альварес бу мавсумда жамоа сафида илк бор майдонга тушди. Бироқ аргентиналик футболчининг қайтиши “Атлетико” мухлисларининг салбий муносабатига сабаб бўлди.

26 ёшли аргентиналик футболчи Ла Лиганинг иккинчи турида “Вильярреал”га қарши уй учрашувининг иккинчи бўлимида захирадан майдонга тушди. Учрашув 2:2 ҳисобида якунланди.

Бу Альвареснинг 2026 йил 5 май куни Чемпионлар лигаси ярим финали жавоб ўйинида “Арсенал”га 0:1 ҳисобида мағлуб бўлганидан кейин “Атлетико Мадрид” сафидаги илк учрашуви бўлди. Ҳужумчи шу вақтдан буён жароҳатидан тикланаётган эди.

AS нашри хабар беришича, мадридликлар мухлислари деярли бутун учрашув давомида Альваресни ҳақорат қилган.

Норозилик футболчининг номи ўйиндан олдин эълон қилинганидан сўнг, жамоанинг ўйин олди машғулотлари вақтида, захира ўриндиғига қайтганида, майдонга тушишга тайёрланаётганида, майдонга кирганида ва учрашувдан кейин ҳам давом этган.

Манбага кўра, айрим мухлислар машғулот вақтида футболчини клубни тарк этишга чақириб, ҳақоратли шиорлар айтган.

“Вильярреал”га қарши учрашувдан сўнг аргентиналик футболчи ҳам жамоадошлари билан бирга мухлислар олдига бормади ва тўғридан-тўғри кийим алмаштириш хонасига йўл олди.

Эслатиб ўтамиз, аввалроқ Альварес “Атлетико Мадрид”дан кетишни ўйлаётгани ҳақида хабарлар тарқалган эди.