Berbok kutilmaganda Kiyevga bordi

Germaniya Tashqi ishlar vaziri Annalena Berbok bugun, 4 noyabr kuni e’lon qilinmagan tashrif bilan Kiyevga bordi. Bu haqda “Deutsche Welle” xabar berdi.

U Kiyevga erta tongda maxsus poyezdda borgan. Tashrif dasturi, dastlabki ma’lumotlarga ko‘ra, Ukraina yuqori martabali amaldorlari bilan uchrashuvlar, Ukraina Tashqi ishlar vaziri Andrey Sibiga bilan qo‘shma matbuot anjumanini o‘z ichiga oladi.

Bu Berbokning Ukrainaga Rossiya tomonidan ushbu mamlakatga qarshi keng ko‘lamli urush boshlanganidan beri sakkizinchi tashrifi. Germaniya Tashqi ishlar vaziri oxirgi marta Ukrainaga 2024 yilning may oyida tashrif buyurgan edi.

“Germaniya butun dunyodagi ko‘plab sheriklar bilan birgalikda Ukraina tomonida. Biz adolatli dunyoga o‘z yo‘llarini davom ettirishlari uchun ukrainaliklarni qo‘llab-quvvatlaymiz”, dedi vazir Kiyevga kelgach.

Berbokning so‘zlariga ko‘ra, Germaniya tomonidan Ukrainaga favqulodda energiya yordami uchun ajratilgan 170 million yevro vayron bo‘lgan issiqlik stansiyalari va elektr uzatish liniyalariga javobdir. Vazirning ta’kidlashicha, tobora kuchayib borayotgan terrorga javob – Rossiya dronlarining zarbalari – havo mudofaasi sohasidagi tashabbus muhim.