Bayroq osgan yigitni ushlagan IIB xodimlari ustidan xizmat tekshiruvi o‘tkazilyapti

Qashqadaryo viloyati Qamashi tumanida O‘zbekiston Respublikasining Davlat bayrog‘i rangidagi tasmani taqib yurgan yigit bilan bog‘liq holat yuzasidan Ichki ishlar xodimlariga nisbatan xizmat tekshiruvi o‘tkaziladi. Bu haqda Bosh prokuratura Matbuot xizmati xabar berdi.

Keltirilishicha, Ichki ishlar xodimlariga nisbatan xizmat tekshiruvi o‘tkazilishi bo‘yicha Qamashi tumani prokuraturasi tomonidan taqdimnoma kiritilgan.

Hozirda Qashqadaryo viloyati IIB tomonidan xizmat tekshiruvi o‘tkazilmoqda.

Ma’lumot o‘rnida, qonunga zid bo‘lgan ma’muriy qaror sud majlisida ko‘rib chiqilgunga qadar bekor qilingan.

Avvalroq, “Yuksalish” harakati raisi Bobur Bekmurodov o‘zining Telegram kanalidagi postida Bosh prokuratura aralashuvidan keyin yopilgan, bayroq ko‘rinishidagi tasma taqqan yigit bilan bog‘liq ish tafsilotlarini oshkor qilishga chaqirgan edi.

“Biroq fuqaroga noqonuniy talab qo‘ygan, tegishli hujjatlarni rasmiylashtirgan va javobgarlikka tortish uchun sudga yuborgan IIB xodimlari hamda noqonuniy qaror qabul qilgan sudning harakatlariga qanday baho berilgani masalasi mavhumligicha qolmoqda”, deydi Bobur Bekmurodov.

Eslatib o‘tamiz, joriy yilning 5 may kuni Qashqadaryo viloyati Qamashi tumanidagi “Chim” dehqon bozorida yelkasiga bayroqli lenta taqib olgan yigitni IIB xodimlari olib ketayotgani aks etgan video tarqalgan edi. Viloyati IIB Matbuot xizmati bunga munosabat bildirib, fuqaro IIB xodimlari tomonidan to‘xtatilib, O‘zbekiston Respublikasining “Davlat ramzlari to‘g‘risida”gi qonun talablariga ko‘ra bayroqni bunday olib yurish mumkin emasligi, uni yechib qo‘yib davlat ramzlariga hurmatsizlik qilmaslik tushuntirilganida fuqaro IIB xodimlarining qonuniy talablariga bo‘ysunmasdan, qarshilik ko‘rsatganini aytgan edi. Shuningdek, yigitga nisbatan Ma’muriy javobgarlik to‘g‘risidagi kodeksning tegishli moddalari bilan ish ochilgandi. So‘ngra yigitga nisbatan qo‘llanilgan qaror bekor qilindi.