Baydenning o‘g‘liga qarshi ochilgan da’vo ishi yopildi

AQSH Prezidenti Jo Bayden o‘g‘li Xanterni afv etganidan so‘ng mamlakat sudi unga qarshi noqonuniy qurol saqlash ishi bo‘yicha da’vo ishini yopdi. Bu haqda “Associated Press” xabar berdi.

Xabarga ko‘ra, Delaver okrug sudyasi Marellen Noreyka Xanter Baydenga nisbatan hukm chiqishidan bir hafta oldin da’vo ishini yopgan. U 25 yilgacha qamoq jazosiga tortilishi mumkin edi, biroq birinchi marta jinoyat sodir etgan shaxs sifatida kamroq muddat olishi yoki butunlay qamoq jazosida qutulishi ehtimoli yuqori bo‘lgan.

Prokurorlar Xanter Baydenga qarshi da’voni tugatishga qarshi chiqib, sud hujjatlarida afv etish ishni “go‘yo hech qachon sodir bo‘lmagandek” bekor qilmasligini ta’kidlagan.

Kichik Baydenga ko‘ra, u 2018 yilda giyohvand moddalar qaramligida bo‘lgan davrda Delaver shtatida qurol sotib olish uchun federal shaklda giyohvand moddalarni iste’mol qilmagani haqida yolg‘on ko‘rsatmasi uchun uchta og‘ir jinoyatda aybdor deb topilgandi.

Adliya Vazirligi maxsus tergovchisi Xanter Bayden 1,4 million dollar soliq to‘lamaganidan keyin Kaliforniyada ochilgan da’vo ishini bekor qilishga qarshi chiqmoqda. Los-Anjelesdagi okrug sudyasi Mark Skarsi afv farmoni rasman qabul qilingandan so‘ng ishni yopishini ma’lum qilgan. 

Biroq Skarsi Prezidentning o‘g‘li siyosiy sabablarga ko‘ra nishonga olingani haqidagi da’vosiga tanqidiy yondashgan va ikki sudya uning himoyachilari tomonidan shu kabi keltirilgan fikrlarni rad etganini ta’kidlagan.

Eslatib o‘tamiz, AQSH Prezidenti joriy yilning 1 dekabr kuni o‘z va’dalaridan voz kechib, o‘g‘liga so‘nggi 11 yildagi faoliyati uchun to‘liq federal afv berish haqida ma’lum qilgandi. Bu esa Vashingtonda siyosiy to‘polonni keltirib chiqargan. Bu qaror ko‘plab demokratlar va respublikachilarning tanqidiga uchragan. Mazkur holat Baydenning 2025 yil 20 yanvarda lavozimini tark etishga tayyorgarlik ko‘rayotgan bir paytda uning merosiga xavf solishi mumkin.

Mohinur Karimova