“Barbie” va “Oppenheimer”ning muvaffaqiyatiga qaramay kinostudiyalar inqirozga uchrashi mumkin

“Barbie” va “Oppenheimer” filmlarining muvaffaqiyati kinoteatrlar kassalariga katta mablag‘ olib keldi. Jumladan, 1 avgust holatiga ko‘ra, bu ikki film Shimoliy Amerikada jami 525 million AQSH dollari jamg‘ardi. Shunga qaramay, kinoteatr egalari tez orada iqtisodiy inqirozga duch kelishi mumkin. Bu haqda “NBC” nashri xabar berdi.

Gap shundaki, aktyorlar va yozuvchilarning bir vaqtning o‘zida ish tashlashlari teatrlarini yangi filmlarsiz qoldirishi mumkin. Gollivudning yirik studiyalari ba’zi filmlar, jumladan, suratga olish ishlari tugallangan loyihalarni chiqarishni ham keyinga qoldirishni boshladi. Ko‘pgina filmlarning namoyish vaqti qorong‘i bo‘lib qolmoqda. Shuningdek, keyingi yil debyuti rejalashtirilgan, ammo o‘z vaqtida tayyor bo‘lmasligi mumkin bo‘lgan bir qancha blokbasterlarni suratga olish ishlari kechiktirildi.

"Studiyalar kuz va qishki rejalarning asosiy qismi bo‘lgan filmlarni kechiktirishini ko‘rish yoqimli emas va biz buning oldini olishga umid qilamiz. Biz pandemiyadan va bu dahshatli vaziyatdan chiqish uchun juda ko‘p harakat qildik”, dedi Flix Brewhouse kinoteatrlar tarmog‘ining daromadlar bo‘yicha bosh direktori Kris Randleman.

Ish tashlashlar bir necha oy davom etishi kutilmoqda. Aktyor va yozuvchilarning studiyalar bilan kelishuvga erishayotgani haqida esa hech qanday xabarlar yo‘q.

Eslatib o‘tamiz, amerikalik aktyorlar uyushmasi SAG-AFTRA va uning muzokarachilari 12 iyul kuni Gollivud studiyalari bilan kelishuvga erishib bo‘lmagani sabab ish tashlashni tavsiya qildi.