Avstraliyada aholi tomorqasidan timsoh topildi

Avstraliyaning Yangi Janubiy Uels hududida mahalliy aholining uyidan timsoh topildi. Bu haqda “The Guardian” xabar berdi. 

Qayd etilishicha, mamlakatning Umina shahri hududida mahalliy kishilardan biri sudralib yuruvchilar bog‘iga murojaat qilib, uning uyida timsoh borligini xabar qilgan. Timsohlar bo‘yicha mutaxassis esa buni eshitib, hayratda qolgan. Sababi bunday turdagi jonivorlar ushbu hududdan 2500 kilometr shimolda uchrab, Umina uchun noodatiy hisoblanadi. 

Ma’lum bo‘lishicha, urg‘ochi timsohning uzunligi bir metrga yetadi, yoshi esa taxminan 8-10 da ekani aytilgan. Chuchuk suv timsohlari sho‘r suvlarda yashaydigan turdoshlariga nisbatan kamroq xavfli bo‘lsada, insonlar hayotiga xavf tug‘dirishi mumkin.

Uminadan topilgan timsoh o‘z odatiy populyatsiya hududidan qanchalik uzoqda ekani hisobga olinsa, jonivorni bu yerga tashlab ketishgani oydinlashadi. 

“Biz jamoatchilikka yovvoyi jonivorlarni uy hayvoni sifatida litsenziyasiz saqlash noqonuniy va xavfli amaliyot ekanini eslatmoqchimiz”, deydi timsoh qo‘riqchisi Billi Kollett.