“Ajdodimda xitoyliklar bo‘lgan”. Viktoriya Bonya plastik operatsiya sababini ochiqladi

Rossiyalik taniqli bloger va teleboshlovchi Viktoriya Bonya uning ajdodlarida xitoyliklar borligini va ularnikiga o‘xshash ko‘zlarga ega bo‘lish istagi sabab plastik operatsiya qildirganini tan oldi. Bu haqda u intervyularidan birida aytib o‘tdi.

Teleboshlovchining so‘zlariga ko‘ra, unda xitoyliklarning qoni bor va u butun hayoti davomida sharqona go‘zallik orzusida yashagan.

“Menda xitoyliklarning qoni bor. Balki, ishonmasligingiz mumkin, lekin mening beshinchi shajaramda xitoylar bo‘lgan. Men Transbaykaliyada yashadim. U yerda faqat mo‘g‘ullar va xitoylar bor edi. Bu hazil emas. Mening xolam, onamning singlisi, haqiqiy sharq ayoli. Uning ko‘zlari sharqona”, degan bloger.

Shu sababli, Bonya joriy yil 27 avgust kuni 20 million rubl (220 ming 629 AQSH dollari) evaziga blefaroplastika (ko‘z qovoqlarini yoki ko‘z shaklini o‘zgartirish) plastik jarrohlik amaliyotini o‘tkazdi. Ammo boshlovchi operatsiya chog‘ida lablari uni ogohlantirmasdan kattalashtirilganini bildirdi.

Ma’lumot uchun, 1979 yil 27 noyabrda Chita viloyatining Krasnokamensk shahrida tug‘ilgan. Dastlab faoliyatini modellik bilan boshlagan. 2001 yilda Filippinda bo‘lib o‘tgan “Miss Earth World” go‘zallik tanlovida Rossiya sha’nini himoya qilgan. Televideniyedagi karerasini 2006 yilda boshlagan. U boshlovchilik qilgan “Kosmopolit. Video versiyasi” dasturi 2009 yilda Rossiya televideniyesida “Yilning eng yaxshi dunyoviy dasturi” deb topilgan.

Shuningdek, u blogerlik faoliyati bilan shug‘ullanadi. Bonya 2019 yilda Kannda bo‘lib o‘tgan “World Blogger Awards” taqdirlash marosimida “Eng yaxshi turmush tarzi targ‘ibotchisi” nominatsiyasida g‘olib bo‘ldi. 2019 va 2020 yillarda Forbes jurnali uni Rossiyadagi 15 ta eng boy blogerlar ro‘yxatiga kiritdi.

Eslatib o‘tamiz, avvalroq “Slava” taxallusi bilan mashhur bo‘lgan rossiyalik qo‘shiqchi Anastasiya Slanevskaya plastik jarroh uning plastik operatsiyasini yomon bajarganligi ortidan Timur Haydarov va hamkasbi Filipp Kirkorovga ularning sirlarini oshkor qilish bilan tahdid qilgandi.