Armaniston Falastin bilan diplomatik aloqa o‘rnatdi

Falastin va Armaniston bugun, 28 sentyabr kuni rasmiy ravishda barcha darajadagi ikki tomonlama aloqalarni rivojlantirishga qaratilgan diplomatik munosabatlar o‘rnatilganligini e’lon qildi. Bu haqda Birlashgan Millatlar Tashkiloti Bosh Assambleyasining Nyu-Yorkdagi 79-sessiyasi arafasida Falastin Bosh vaziri idorasi ma’lum qildi.

Falastin Bosh vaziri Muhammad Mustafo idorasi bayonotiga ko‘ra, Mustafo Armaniston Tashqi ishlar vaziri Ararat Mirzoyan bilan Falastin va Armaniston o‘rtasidagi diplomatik munosabatlarni rasmiylashtirish uchun qo‘shma deklaratsiya imzolagan.

Mustafo Armanistonning Falastin davlatini tan olishini olqishlab, uni “tinchlikka qo‘yilgan haqiqiy sarmoya” va Isroil ishg‘oliga barham berish hamda mustaqil Falastin davlatini barpo etishga qaratilgan ikki davlat yechimini qo‘llab-quvvatlash yo‘lidagi amaliy qadam sifatida baholadi. Bosh vazir, shuningdek, Armanistonning Falastin bilan bog‘liq rezolyutsiyalarga ijobiy ovoz bergani uchun minnatdorlik bildirdi.

Ma’lumot uchun, joriy yilning 21 iyun kuni Armaniston Tashqi ishlar vazirligi Falastin davlatini rasman tan oldi va Armaniston bu muhim qadamni qo‘ygan 149-davlatga aylandi. Armaniston qarori Falastinning o‘z suverenitetini xalqaro miqyosda tan olishga qaratilgan ko‘p yillik diplomatik sa’y-harakatlari ortidan qabul qilingan. Armanistonning Falastinni tan olishi arab davlatining xalqaro maydondagi mavqeini mustahkamlaydi va boshqa davlatlar uchun ham xuddi shunday harakatlarga turtki bo‘lishi mumkin.

Joriy yilda Ispaniya, Norvegiya va Irlandiya kabi davlatlar ham Isroilning G‘azoga qarshi o‘tgan oktyabr oyida boshlangan halokatli urushidan so‘ng Falastin davlatini tan oldi.

BMT Xavfsizlik Kengashining zudlik bilan o‘t ochishni to‘xtatishga chaqiruvchi rezolyutsiyasini buzgan Isroil, 2023 yilning 7 oktyabrida Falastinning HAMAS guruhining transchegaraviy hujumidan so‘ng G‘azoga qarshi shafqatsiz hujumini davom ettirdi.

Mahalliy sog‘liqni saqlash idoralari ma’lumotlariga ko‘ra, o‘shandan beri 41 ming 600 ga yaqin odam, asosan ayollar va bolalar halok bo‘lgan va 96 ming 200 dan ortiq kishi jarohatlangan.

Isroilning hujumi oziq-ovqat, toza suv va dori-darmonlarning keskin tanqisligiga olib kelgan davom etayotgan blokada sharoitida hududning deyarli butun aholisini ko‘chishiga olib keldi.

Isroil, shuningdek, G‘azodagi harakatlari uchun Xalqaro Sudda genotsid ayblovlariga duch kelmoqda.