Anchelotti mavsum yakunida “Real”dan ketadi

Madridning “Real” klubi bosh murabbiyi Karlo Anchelotti mavsum yakunida jamoani tark etadi. Bu haqda “Onda Cero” nashri xabar berdi.

Manbaga ko‘ra, bu masala bo‘yicha klub rahbariyati va murabbiy o‘zaro kelishib olgan. Ta’kidlanishicha, Anchelottining o‘zi mavsum yakunida iste’foga chiqishni Peresdan iltimos qilgan. Florentino esa mutaxassisning iltimosini yerda qoldirmadi. Ayni damga kelib, italiyalik mutaxassis o‘rini “Bayer” ustozi Xabi Alonso egallashi taxmin qilinmoqda.

Ma’lumot o‘rnida, Karlo Anchelotti “qirollik klubi”da ikki bor murabbiylik faoliyatini olib borgan. Dastlab, u 2013-2015 yillarda klubda ishlagan. Keyin u yana 2021 yilda jamoa boshqaruvini qo‘lga olgan. “Real” murabbiy bilan birga La Liga, Ispaniya kubogi, Ispaniya Superkubogi, Yevropa chempionlar ligasida 2 marta, Yevropa Superkubogi va “Intercontinental” kubogida zafar quchdi.

Eslatib o‘tamiz, avvalroq, agar Anchelotti mavsum yakunida birorta sovrinni qo‘lga kiritmasa, jamoadan ketishi haqida xabar berilgan edi.