Amazon Yerni yangi internet tarmog‘i bilan ta’minlamoqchi

Amazon o‘zining minglab Kuiper internet sun’iy yo‘ldoshlarini qurish uchun NASA’ning Floridadagi Kennedi kosmik markazida 120 million dollarlik ishlov berish uskunasini qurmoqda. Bu haqda “Reuters” nashri xabar berdi.

Ushbu uskuna 100 ming kvadrat fut kattalikka ega. Amazon umumiy hisobda o‘zining Kuiper loyihasiga qariyb 10 milliard dollar sarmoya kiritishga va’da bergan. U butun dunyo bo‘ylab internetni uzatish uchun mo‘ljallangan 3200 ta past orbitali sun’iy yo‘ldoshlar tarmog‘ini shakllantirishni rejalashtirmoqda.

Kuiper internet tarmog‘i SpaceX kompaniyasining StarLink internet tarmog‘i bilan raqobatlasha olishi  va Amazon veb-xizmatlarini kuchaytirishi kutilmoqda.

Kompaniya o‘zining birinchi ommaviy ishlab chiqarilgan sun’iy yo‘ldoshlarini 2024 yil boshigacha uchirishni, 2026 yilgacha esa tarmoqning yarmini orbitaga joylashtirish ishlarini boshlashni maqsad qilgan.

“Amazon uskuna qurilishini yanvar oyida boshlagan va uni 2024 yil oxirigacha yakunlashni rejalashtirmoqda. 2025 yilning birinchi yarmida sun’iy yo‘ldoshlarning birinchi partiyasini qayta ishlash uchun zavodga jo‘natish niyatida”, dedi Amazon’ning Kuiper ishlab chiqarish operatsiyalari bo‘yicha vitse-prezidenti Stiv Metayer.

Kompaniya Boeing-Lockheed qo‘shma korxonasi va Jeff Bezosning Blue Origin kosmik kompaniyasi bilan birgalikda potensial qiymati milliardlab dollar bo‘lgan 77 ta og‘ir yuk ko‘taruvchi raketa uchirish bo‘yicha shartnoma tuzdi.

 “Amazon transport bilan bog‘liq loyihalar uchun davlat granti doirasida mablag‘ olish huquqiga ega, ammo hozirgacha hech qanday mablag‘ olmadi”, dedi Space Florida kompaniyasi vakili Anna Ferrer.

Eslatib o‘tamiz, oy boshida Amazon Gollivud yulduzi Leonardo Dikaprio bilan Amazon o‘rmonlarini asrab qolish uchun 183,4 million yevro miqdorda xayriya mablag‘i ajratgan.

Sevara Husniddinova