Alisher Usmonov “Forbes” reytingiga ilk bor O‘zbekiston nomidan kiritildi

Amerikaning “Forbes” nashri bu yil ilk bor Alisher Usmonovni O‘zbekiston nomidan o‘zining har yili tuziladigan dunyoning eng boy insonlari ro‘yxatiga qo‘shdi. Bu haqda nashr tomonidan e’lon qilingan ro‘yxatda keltirilgan.

Reytingda boyligi 16,7 milliard dollarga baholangan tadbirkor oldingidek Rossiya emas, O‘zbekiston vakili sifatida qayd etilgan. USM Holdings asoschisi Usmonov “Forbes” milliarderlar ro‘yxatida ko‘p yillardan beri joy olib keladi. Joriy yilda u 144-o‘rindan 125-o‘ringa ko‘tarilgan. Mazkur o‘sish uning boyligi 3,3 milliard dollarga ortgani bilan bog‘liq.

Mazkur reytingda ilgari rossiyalik deb hisoblangan jami 24 tadbirkor boshqa davlatlar vakili sifatida qayd etilgan. Odatda bunday o‘zgarishlar tadbirkorlarning o‘z iltimosiga binoan amalga oshiriladi. Hisob-kitoblarga ko‘ra, ushbu milliarderlarning jami boyligi taxminan 110 milliard dollarni tashkil etadi.

Shuningdek, Aleksey Kuzmichev (7,5 mlrd dollar) Fransiya, Petr Aven (4,7 mlrd dollar) Latviya, Yelena Baturina (1,3 mlrd dollar) Buyuk Britaniya, Leonid Fedun (10,4 mlrd dollar) Monako, Vyacheslav Kantor (9,5 mlrd dollar) Isroil vakili sifatida qayd etilgan. Bundan tashqari, Arkadiy Voloj (1,2 mlrd dollar), Aleksandr Mamut (1,4 mlrd dollar) ham Isroil vakillari sifatida kiritilgan.

Nashr ma’lumotlariga ko‘ra, 53 yoshli tadbirkor Ilon Maskning boyligi 342 milliard dollarni tashkil qilmoqda va u reytingning eng yuqorisidan joy olgan. O‘tgan yil davomida Tesla va SpaceX egasi 147 milliard dollarga boyigan.

Meta asoschisi Mark Sukerberg 216 milliard dollar boyligi bilan ikkinchi o‘ringa ko‘tarilgan – yil davomida uning boyligi 39 milliard dollarga o‘sgan. Keyingi o‘rinlarda Amazon asoschisi Jeff Bezos (215 milliard dollar) va Oracle asoschisi Larri Ellison (192 milliard dollar) joy olgan.