Alessandro Nesta Xolandni to‘xtatishning yo‘lini aytdi

Italiya terma jamoasi va “Milan” klubining sobiq himoyachisi afsonaviy Alessandro Nesta Ronaldo Nazario bilan bo‘lgan tajribasi tufayli Erling Xolandni ham to‘xtata olishi mumkin, deb hisoblaydi. Bu haqda Nestaning so‘zlariga tayanib, “Goal” nashri xabar berdi.

Xoland shu yozda “Manchester Siti”ga qo‘shilganidan beri Angliya Premer ligasidagi aksariyat jamoalarning himoyasini parchalab tashladi. Norvegiyalik futbolchi atigi sakkizta o‘yinda uchta xet-trik qayd etgan. Bu liga tarixidagi eng tezkor natija hisoblanadi. Nesta esa Erlingni Ronaldo Nazarioga qarshi o‘yinlarda orttirgan tajribasi tufayli to‘xtata olishiga ishonmoqda.

“Ha, men Erling Xolandga qarshi o‘ynay olaman. Chunki men braziliyalik Ronaldoga qarshi o‘ynaganman. Xoland juda yaxshi hujumchi, ammo Ronaldo umuman boshqa dunyo edi. Men Messiga qarshi, Krishtianu Ronalduga qarshi o‘ynaganman. Biroq hech qaysi Ronaldoga teng kelolmaydi. U men uchun butunlay boshqacha futbolchi edi”, degan italiyalik sobiq himoyachi.

Alessandro Nesta Xolandni to‘xtatib qolish uchun himoyachilarga maslahat berar ekan, unga umuman bo‘sh hudud qoldirib, bo‘lmasligini aytib o‘tgan.

“Men Xolandga iloji boricha yaqin bo‘lishga harakat qilardim. U yugurishni boshlaganida, men uning yo‘lini to‘sib qo‘ygan bo‘lardim! Erlingga juda ko‘p bo‘shliq qoldirsang, sen aniq “o‘lasan”, degan “Milan”ning sobiq futbolchisi.

Qayd etish kerakki, Alessandro Nesta barcha davrlarning eng yaxshi himoyachilaridan biri hisoblanadi. U 1993 yildan 2002 yilgacha “Latsio” sharfini himoya qilgan. Shundan so‘ng, Nesta faoliyatni o‘sha paytlarda dunyoning eng kuchli jamoasi bo‘lmish “Milan”da davom ettirgan. U bilan to‘qnash kelgan hujumchilarga hech qachon oson bo‘lmagan.

Ma’lumot uchun, joriy mavsum Erling Xoland “Siti” safida 12 ta uchrashuvda maydonga tushib, 19 ta gol urdi. “Transfermarkt” portali norvegiyalik hujumchini 150 million yevroga baholamoqda.