“Al-Nasr” hali sotib olinmagan futbolchini o‘yin qaydnomasiga kiritdi

“Al-Nasr” “Bavariya” hujumchisi Sadio Maneni Arab chempionlar kubogi uchun qaydnomaga kiritdi. Bu haqda “Ariyadhiah” xabar berdi.

Manbaga ko‘ra, Saudiya klubi mutasaddilari va futbolchining agenti o‘rtasida Tokioda bo‘lib o‘tgan uchrashuvdan so‘ng, “Al-Nasr” 31 yoshli hujumchini sotib olishga yaqin turibdi.

O‘tgan mavsumda hujumchi “Bavariya” safida barcha turnirlar doirasida 38 ta o‘yinda maydonga tushib, 12 ta gol va 6 ta golli uzatmaga mualliflik qildi. Futbolchining Myunxen klubi bilan shartnomasi 2025 yilning iyun oyi oxirigacha amal qiladi. “Transfermarkt” internet portaliga ko‘ra, futbolchining taxminiy narxi 25 million yevroni tashkil qiladi.

Eslatib o‘tamiz, o‘tgan hafta Mane “Al-Nasr”ga o‘tishga rozilik bildirgandi. Saudiya klubi hujumchiga yiliga 25 million yevro maosh va’da qilgan, biroq “Bavariya” uning transferi uchun 32 million yevro va bonus olishni istamoqda.