AQSHda sud-tibbiyot eksperti 654 ta DNK testini soxtalashtirdi

Qo‘shma Shtatlarda kriminolog 654 ta DNK testi natijalarini soxtalashtirgan, buning asosida yuzlab holatlar ochilgan. Biroq uning harakatlaridan ko‘rilgan zarar 11 million dollarga baholanmoqda. Bu haqda “The Washington Post” nashri xabar berdi.

Kolorado shtati tergov byurosida ishlagan 64 yoshli Ivonne Vuds bir qator og‘ir jinoyatlarda ayblanmoqda: yolg‘on guvohlik berish, soxtalashtirish, hukumat amaldorlariga ta’sir o‘tkazishga urinish, kiberjinoyatlar va eng muhimi, 654 ta DNK testlarini soxtalashtirish. 

Prokurorlarning ta’kidlashicha, kriminolog tomonidan taqdim etilgan test natijalari yuzlab ishlarni, shu jumladan 30 dan ortiq zo‘rlash holatlarini hal qilishda ishlatilgan. 

Tergov davomida ma’lum bo‘lishicha, Ivonne Vuds test natijalarini tahrir qilib, jinsiy zo‘ravonlik holatlarida erkak DNKsi borligi haqidagi ma’lumotlarni olib tashlagan. U, shuningdek, so‘roq paytida o‘zi tan olganidek, ishlarni tezroq oldinga siljitish va qo‘shimcha ishlardan qochish uchun ifloslangan namunalar haqidagi ma’lumotlarni tuzatgan. 

Kriminolog 29 yil davomida byuroda ishlagan, uning aksariyati rahbariyat bilan yaxshi munosabatda bo‘lgan. U o‘zining professionalligi va o‘z ishiga sadoqati uchun maqtovga sazovor bo‘ldi: ayol ko‘pincha ishda kech qolar va shunday bo‘lsa ham yaxshi natijalarni ko‘rsatgan. Ammo, ajoyib xususiyatlarga qaramay, kriminologning ish sifatiga shubhalar allaqachon paydo bo‘lgandi. 

Shunday qilib, 2018 yilda Ivonne Vuds u ishlayotgan DNK namunasida ifloslanish izlari aniqlanganidan keyin majburiy ta’tilga yuborildi. Keyin ayol xatosini shoshqaloqlik deb tushuntirdi va jazodan qutulib qoldi.

Keyingi tergov 2023 yilda, Vuds nafaqaga chiqqanidan so‘ng, tadqiqot loyihasi ustida ishlayotgan tadqiqotchi-stajyor uning hisobotlarida xatoliklarni aniqlaganidan so‘ng boshlandi.

Eslatib o‘tamiz, avvalroq AQSHning Tennessi shtatidagi maktabda o‘quvchi tengdoshini otib o‘ldirib, so‘ng o‘z joniga qasd qilgandi va yana bir o‘quvchini yaralagandi.