АҚШда суд-тиббиёт эксперти 654 та ДНК тестини сохталаштирди

Қўшма Штатларда криминолог 654 та ДНК тести натижаларини сохталаштирган, бунинг асосида юзлаб ҳолатлар очилган. Бироқ унинг ҳаракатларидан кўрилган зарар 11 миллион долларга баҳоланмоқда. Бу ҳақда “Тhe Washington Post” нашри хабар берди.

Колорадо штати тергов бюросида ишлаган 64 ёшли Ивонне Вудс бир қатор оғир жиноятларда айбланмоқда: ёлғон гувоҳлик бериш, сохталаштириш, ҳукумат амалдорларига таъсир ўтказишга уриниш, кибержиноятлар ва энг муҳими, 654 та ДНК тестларини сохталаштириш. 

Прокурорларнинг таъкидлашича, криминолог томонидан тақдим этилган тест натижалари юзлаб ишларни, шу жумладан 30 дан ортиқ зўрлаш ҳолатларини ҳал қилишда ишлатилган. 

Тергов давомида маълум бўлишича, Ивонне Вудс тест натижаларини таҳрир қилиб, жинсий зўравонлик ҳолатларида эркак ДНКси борлиги ҳақидаги маълумотларни олиб ташлаган. У, шунингдек, сўроқ пайтида ўзи тан олганидек, ишларни тезроқ олдинга силжитиш ва қўшимча ишлардан қочиш учун ифлосланган намуналар ҳақидаги маълумотларни тузатган. 

Криминолог 29 йил давомида бюрода ишлаган, унинг аксарияти раҳбарият билан яхши муносабатда бўлган. У ўзининг профессионаллиги ва ўз ишига садоқати учун мақтовга сазовор бўлди: аёл кўпинча ишда кеч қолар ва шундай бўлса ҳам яхши натижаларни кўрсатган. Аммо, ажойиб хусусиятларга қарамай, криминологнинг иш сифатига шубҳалар аллақачон пайдо бўлганди. 

Шундай қилиб, 2018 йилда Ивонне Вудс у ишлаётган ДНК намунасида ифлосланиш излари аниқланганидан кейин мажбурий таътилга юборилди. Кейин аёл хатосини шошқалоқлик деб тушунтирди ва жазодан қутулиб қолди.

Кейинги тергов 2023 йилда, Вудс нафақага чиққанидан сўнг, тадқиқот лойиҳаси устида ишлаётган тадқиқотчи-стажёр унинг ҳисоботларида хатоликларни аниқлаганидан сўнг бошланди.

Эслатиб ўтамиз, аввалроқ АҚШнинг Теннесси штатидаги мактабда ўқувчи тенгдошини отиб ўлдириб, сўнг ўз жонига қасд қилганди ва яна бир ўқувчини яралаганди.