AQSH O‘rta yer dengiziga 12 mingdan ortiq askarini joylashtiradi – OAV 

Yaqin Sharqda mojaro avj olgan bir paytda AQSH Harbiy-dengiz kuchlari va dengiz piyodalarining 10 ta kemasida 12 mingdan ortiq xodimi Sharqiy O‘rta yer dengiziga yetib borgan. Bu haqda AQSH harbiy-dengiz kuchlari ma’lumotlariga tayanib, “Nikkei Asia” nashri xabar berdi.

Qayd etilishicha, bortida 4,5 mingdan ortiq harbiy dengizchilar bo‘lgan Jerald Ford samolyot tashuvchi kemasi allaqachon mintaqaga yetib kelgan. Unga jami 1,6 mingdan ortiq harbiy xizmatchilar sig‘adigan beshta kema hamrohlik qilmoqda. “Duayt Eyzenxauer” samolyot tashuvchi kemasi ham 5000 askar va uchta eskort kemasi bilan Yaqin Sharqqa jo‘nab ketgan. Ushbu kemalar bortida mingga yaqin amerikalik harbiy xizmatchi bor.

“The Washington Post” va “Fox News” AQSH Qurolli kuchlari tomonidan Yaqin Sharqqa yuborilayotgan qo‘shimcha kuchlar jami 4 mingdan ortiq askarlarni o‘z ichiga olishini ma’lum qilgan. 

Nashrlarga ko‘ra, harbiylar Bataan, Carter Hall va Mesa Verde amfibiya hujum kemalarida joylashgan. Birinchi ikkita kema 16 oktyabr kuni Ummon ko‘rfazida, uchinchisi O‘rta yer dengizida bo‘lgan. Bu kuch va vositalar aynan qayerga o‘tkazilishi hozircha e’lon qilinmagan.

Eslatib o‘tamiz, oldinroq CNN nashri AQSH Mudofaa vazirligi Isroil qirg‘oqlariga ikki ming nafar dengiz piyoda askarlarining tezkor kuchlarini yuborishga qaror qilgani haqida ma’lumot bergandi.