AQSH Kubaning sobiq prezidentini qotillikda aybladi

AQSH kecha, 20 may kuni Kubaning sobiq prezidenti Raul Kastroga nisbatan qotillik ayblovlarini e’lon qildi. Bu haqda “Reuters” xabar berdi.

Ayblov AQSH va Kuba o‘rtasidagi Sovuq urush davridan beri davom etib kelayotgan keskin munosabatlarni yanada yomonlashtirdi. Shu bilan birga, AQSH Prezidenti Donald Tramp Kubada hokimiyat almashishini ham talab qilmoqda. Mamlakatni esa 1959 yildagi inqilobdan keyin Fidel Kastro boshchiligidagi kommunistlar boshqarib kelmoqda.

Ayblovga ko‘ra, Kuba razvedkasi Floridadagi “Brothers to the Rescue” guruhi haqida ma’lumot yig‘ish uchun josuslar tarmog‘idan foydalangan. Bu tarmoqning ayrim a’zolari 20 yildan ko‘proq vaqt avval ham sudlangan. Ulardan biri 1996 yilda samolyotlarning urib tushirilishi bilan bog‘liq jinoyatda aybdor deb topilgan.

Kubaning Tashqi ishlar vaziri Brunu Rodrigesh bu ayblovlarni “noqonuniy va asossiz” deb atadi. U Kuba “Brothers to the Rescue” samolyotlarini o‘zini himoya qilish maqsadida urib tushirganini yana bir bor ta’kidladi va guruhni “terrorchi tashkilot” deb atadi.

Rodrigesh X ijtimoiy tarmog‘ida AQSH Kubaga qarshi “tajovuzni kuchaytirishga” urinayotganini yozdi.

“Brothers to the Rescue” samolyotlari urib tushirilgan voqea

1996 yilda Kuba harbiy-havo kuchlariga qarashli MiG-29 qiruvchi samolyoti “Brothers to the Rescue” tashkilotiga tegishli ikkita Cessna samolyotini urib tushirgan edi. Hodisa oqibatida uch nafar AQSH fuqarosi va bir nafar “green card” egasi halok bo‘lgan.

BMTning Xalqaro fuqaro aviatsiyasi tashkiloti samolyotlar Kuba havo hududidan tashqarida bo‘lganini bildirgan. Kuba esa buni rad etib, samolyotlar o‘z havo hududida urib tushirilganini ta’kidlab keladi.

Ayblovga ko‘ra, voqea paytida Mudofaa vaziri bo‘lgan Raul Kastro guruhga qarshi kuch ishlatishga ruxsat bergan. Hujjatlarda Kuba razvedkasi “Brothers to the Rescue” faoliyatiga josuslar tarmog‘i orqali kirib borgani ham qayd etilgan.

Ayblov AQSH va Kuba o‘rtasidagi keskinlik kuchaygan bir paytda e’lon qilindi. Donald Tramp ma’muriyati Kubaga neft yetkazib berayotgan davlatlarga yuqori bojlar joriy etish bilan tahdid qilmoqda.

AQSH Davlat kotibi Marko Rubio esa Kuba keng ko‘lamli siyosiy va iqtisodiy islohotlarga muhtojligini aytib, hozirgi hukumatni “qari va layoqatsiz odamlar” boshqarayotganini ta’kidlagan.