AQSH Qodirovning onasiga nisbatan sanksiya qo‘lladi 

Checheniston rahbari Ramzan Qodirovning onasi Aymani Qodirova Amerika Qo‘shma Shtatlari Moliya vazirligining chet el aktivlarini nazorat qilish boshqarmasi (OFAC) sanksiyalar ro‘yxatiga kiritildi. Bu haqda OFAC rasmiy saytida ma’lum qilindi.

Unga ko‘ra, Rossiya va Chechenistonning bir qator ramiy mansabdorlari qatorida Ramzan Qodirovning onasi Aymani Qodirova ham AQSH sanksiyalariga uchragan.

Qo‘shma Shtatlar Prezidenti Jo Baydenga ko‘ra, bu sanksiyalar ukrainalik bolalarning Rossiyaga noqonuniy deportatsiya qilingani uchun qo‘llanilgan. 

Sanksiyalar ro‘yxatidan quyidagilar joy olgan:

• Checheniston rahbarining onasi – Aymani Qodirova;
• Checheniston hukumati rahbari – Muslim Xuchiyev;
• Chechenistondagi Inson huquqlari bo‘yicha komissar – Mansur Soltayev;
• Ichki ishlar vazirligining Axmat Qodirov nomidagi Checheniston bo‘yicha maxsus polki komandiri – Zamid Chalayev;
• Ukrainaning Zaporoje viloyatining qo‘shib olingan qismidagi “ta’lim vaziri” – Yelena Shapurova.
• Anneksiya qilingan Sevastopoldagi “Yunarmiya” rahbari – Vladimir Kovalenko;
• Sevastopol universiteti rektori – Vladimir Nechayev;
• Kaluga viloyati bolalar huquqlari bo‘yicha komissari – Irina Ageyeva;
• Rostov viloyatidagi bolalar ombudsmani – Irina Cherkasova;
• Belgorod viloyatidagi bolalar ombudsmani – Galina Pyatix;
• Ma’lumot uchun, Qodirova Ukrainaning Rossiya tomonidan bosib olingan hududlari aholisi va jangarilarga gumanitar yordam jo‘natib turuvchi jamg‘armaga rahbarlik qiladi.

Eslatib o‘tamiz, avvalroq Amerika Qo‘shma Shtatlari Prezidenti Jo Bayden AQSH Rossiyaga qarshi yangi sanksiyalar e’lon qilgani haqida bayonot chiqarilgan edi. Bayden mazkur bayonotda sanksiyalar haqida so‘z ochish bilan bir qatorda Ukrainani mustaqillik kuni bilan tabriklagan va mamlakat Kiyevga kerakli yordamni ko‘rsatishda davom etishini aytgan.