AQSH Xalqaro jinoiy sudga qarshi sanksiyalar joriy etdi

AQSH Prezidenti Donald Tramp ma’muriyati Xalqaro jinoiy sudga (XJS) qarshi sanksiyalar kiritdi. Bu haqda “Reuters” xabar berdi.

Nashr AQSH Davlat kotibi Marko Rubioning bayonotidan iqtibos keltirdi.

“Prezident Tramp hech qachon Xalqaro jinoiy sudga amerikaliklarni ta’qib qilishga yo‘l qo‘ymaydi. Aynan shu sababli bugun Qo‘shma Shtatlar unga qarshi sanksiyalar joriy etmoqda. Biz ushbu noqonuniy sudni resurslardan mahrum qilib va uning faoliyat yuritish qobiliyatini falajlab, u bilan amalga oshiriladigan operatsiyalarni taqiqlaymiz”, deydi u.

Ushbu qaror XJSning sobiq sudyasi Navanetxem Pilley Nobel tinchlik mukofotini qo‘lga kiritganidan bir necha soat o‘tib qabul qilindi. Janubiy afrikalik sudya va huquqshunos ushbu mukofotga “tinchlik va xalqaro huquq manfaatlari yo‘lidagi mehnati uchun” sazovor bo‘lgan edi.

Nobel qo‘mitasi uning mehnat yo‘li “faoliyatining ilk bosqichida Nelson Mandela va apartheydning boshqa raqiblarini himoya qilishdan tortib, davrning bir qator asosiy xalqaro jarayonlarida sudya bo‘lib ishlashgacha” bo‘lgan davrni qamrab olgan.

XJS prokurori o‘rinbosari Najat Shamim Xon Vashingtonning qarorini qoralagan va bu tribunal ishini to‘xtata olmasligini ma’lum qilgan. 

“Ushbu sanksiyalar xalqaro darajadagi huquq ustuvorligiga va mustaqil sud organi tomonidan olib borilayotgan ishga putur yetkazishga qaratilgan. Bizning ishimiz barcha ishlar, barcha tergovlarimiz va sud ta’qiblarimiz doirasida davom etaveradi” , deydi u.

AQSH XJS faoliyatini belgilovchi Rim statutini ratifikatsiya qilmagan va uning a’zosi hisoblanmaydi. Ular, ayniqsa, izroillik mulozimlar, jumladan, Bosh vazir Binyamin Netanyaxuni hibsga olishga order berilganidan so‘ng, shuningdek, Afg‘onistondagi amerikalik askarlarga nisbatan keyinchalik yopilgan tergov munosabati bilan bir necha bor o‘z noroziligini bildirgan.

Eslatib o‘tamiz, avvalroq Xalqaro jinoiy sud Afg‘onistondagi vaziyat bo‘yicha jinoyat ishi doirasida “Tolibon” muvaqqat hukumatining to‘rt nafar yuqori martabali vakilini hibsga olishga berilgan orderlardan maxfiylik muhrini olib tashlagani va ularni e’lon qilgani haqida xabar berilgan edi.