Abdusattorov shaxmat mundialida mag‘lubiyatsiz seriyasini davom ettirmoqda
Sport
−
27 Oktabr 2022 3197
Ayni kunlarda Islandiya poytaxti Reykyavikda shaxmat bo‘yicha “World Fischer Random Chess Championship 2022” musobaqasi bahslari bo‘lib o‘tmoqda. Dastlabki turlarda g‘alabaga erishgan o‘zbekistonlik grossmeyster Nodirbek Abdusattorov zafarli yurishini davom ettirdi.
3 va 4-turda Nodirbek mezbonlar vakili Steyn Gretarssonni har ikkala partiyada ham mag‘lubiyatga uchratib, ochkolari sonini 8 taga yetkazib oldi. Keyingi turlarda Abdusattorov rossiyalik Yan Nepomnyashiy va AQSH vakili Uesli Soga qarshi dona suradi.
Ma’lumot uchun, Jahon chempionatining ikkinchi guruhida amerikalik Xikaru Nakamura 6 ochko bilan yetakchilik qilmoqda. Norvegiyalik Magnus Karlsen esa 2-pog‘onani band etib turibdi.
Eslatib o‘tamiz, guruhlarda 1 va 2-o‘rinlarni qo‘lga kiritgan shaxmatchilar Jahon chempionatining yarim final yo‘llanmasini qo‘lga kiritishadi.
Shaxzod Shukurov
