5 ming dollar! Yangi O‘zbekiston universitetida o‘qish narxlari e’lon qilindi

O‘zbekiston Respublikasi Prezidenti Shavkat Mirziyoyev tashabbusi bilan tashkil etilgan Yangi O‘zbekiston universitetida o‘qish uchun kontrakt narxi e’lon qilindi. Bu haqda univeritetning veb-saytida ma’lumot berilgan. 

Qayd etilishicha, universitetda mahalliy va xorijiy talabalar uchun alohida narx belgilangan. 

Unga ko‘ra, kontrakt miqdori mahalliy talabalar uchun bir semestrga 24 million 850 ming so‘m, xorijiy talabalar uchun esa 5 ming AQSH dollari etib belgilangan. 

Ma’lum qilinishicha, o‘qish davomiyligi ikki semestrni tashkil etadi.

Ma’lumot o‘rnida, universitet davlat oliy ta’lim muassasasi shaklida tashkil etiladi. Uning asosiy vazifalari – nufuzli xorijiy o‘quv yurtlarining ta’lim dasturlari asosida yuksak kasbiy bilim va malakalarga ega bo‘lgan istiqbolli kadrlar tayyorlash, talabalarning intellektual qobiliyatini rivojlantirish, buning uchun har tomonlama qulay muhitni shakllantirishdir.

Universitetda 5 ta – muhandislik, tabiiy fanlar, boshqaruv, agrotexnologiyalar va axborot texnologiyalari fakultetlari bo‘ladi. Darslar o‘zbek va ingliz tillarida olib boriladi. Kredit-modul tizimi joriy etilib, o‘qish davlat granti va to‘lov-kontrakt asosida amalga oshiriladi.

Ushbu ta’lim maskanining o‘quv binosi va kampuslari ham zamonaviy, xalqaro BRYeEAM sertifikatlariga mos bo‘ladi. Ilk o‘quv yili shu yil sentyabrdan boshlanadi. Yangi bino qurilguncha darslar Jahon iqtisodiyoti va diplomatiya universitetining bo‘sh binolarida vaqtinchalik o‘tib turiladi.

Iqtisodiyot  tarmoqlaridagi ehtiyojlardan kelib chiqib, ilmiy tadqiqotlar olib borish, talabalarni ilmiy va innovatsion faoliyatga keng jalb etish ham universitetning asosiy vazifalaridan. Shu maqsadda dunyoning yetakchi universitet va ilmiy-tadqiqot muassasalari bilan hamkorlik yo‘lga qo‘yiladi, ilmiy jurnal ta’sis etiladi.

Eslatib o‘tamiz, avvalroq, Prezident Shavkat Mirziyoyev qaroriga muvofiq yangi O‘zbekiston universiteti tashkil etilgani xaqida xabar bergandik.