2 yil oldin o‘ldirilgan Narinning ishi qayta ko‘rilishi mumkin

2024 yil 21 avgust kuni Diyorbakirda g‘oyib bo‘lganidan 19 kun o‘tib jonsiz tanasi topilgan sakkiz yoshli Narin Guran vafotining ikkinchi yilida qabri boshida xotirlandi. Marosimda uning oilasi va ko‘plab fuqarolar ishtirok etdi. Bu haqda “Haberler“ xabar berdi.

Narin Guranning otasi Arif Guran: “Ular boshimizga qiyomatni solishdi”, deya sud jarayoniga norozilik bildirib, yana adolat talab qilgan.

Narinning xotirasi yod etildi

Qayd etilishicha, Narin Guran vafotining ikkinchi yili munosabati bilan qabri boshida yod etilgan. Bag‘lar tumanining Tavshanterepe mahallasida tashkil etilgan xotira dasturida Narinning oila a’zolari, siyosiy partiyalar va nodavlat notijorat tashkilotlari vakillari, shuningdek, ko‘plab fuqarolar ishtirok etgan. Dastur davomida Qur’on tilovat qilinib, mavlud va duolar o‘qilgan, shuningdek, Narinning qabri ustiga chinnigullar qo‘yilgan. Xotira marosimidan so‘ng oila a’zolari va ishtirokchilar Narinning qabristonidan uning g‘oyib bo‘lishidan oldin oxirgi marta ko‘rilgan hududgacha piyoda yurishgan.

Otasi adolat talab qildi

Xotira marosimida so‘zlagan ota Arif Guran oilasi boshidan kechirayotgan og‘riqni tasvirlab bo‘lmasligini aytib, adolat talab qilgan.

“Bugun biz uchun qiyomat kuni. Ular boshimizga qiyomatni solishdi. Bizni tiriklayin ko‘mib yuborishdi“, degan qizning otasi.

U qizining o‘limiga mas’ul deb hisoblaydigan Nevzat Baxtiyor haqida gapirar ekan, tergov va sud jarayoni oila uchun katta fojiaga aylanganini ta’kidlagan.

“Bizni qamoqdan chiqarmang. Qizim uchun adolatga erishing. Qizimning qoni yerda qolmoqda“, degan Guran.

Ishni qayta ko‘rish talabi yangradi

Xotira dasturida so‘zga chiqqan Xalqlar tengligi va demokratiya partiyasining Kojaeli viloyatidan deputati O‘mer Faruk Gergerlio‘g‘lu ham Narin Guran ishi bo‘yicha sud jarayonini tanqid qilgan.

Gergerlio‘g‘lu mazkur ish bo‘yicha huquqiy jarayon qayta ko‘rib chiqilishi zarurligini aytib, sud ishini yangidan ko‘rishga chaqirgan. Uning ta’kidlashicha, ish jamoatchilik bosimi yoki ommaviy axborot vositalaridagi bahslar asosida emas, balki dalillar va qonun asosida yuritilishi kerak.

Jasad 19 kundan keyin topilgan

8 yoshli Narin Guran 2024 yil 21 avgust kuni Tavshanterepe mahallasidagi uyidan Qur’on kursiga borish uchun chiqib ketgan va shundan keyin undan darak bo‘lmagan. Qariyb 2 ming kishi ishtirok etgan qidiruv ishlari boshlanganidan 19 kun o‘tib, 2024 yil 8 sentyabr kuni Narinning jonsiz tanasi Egertutmaz daryosidan topilgan.

Ona, aka va amaki umrbod qamoq jazosiga hukm qilingan

Narin Guran qotilligi ishi bo‘yicha onasi Yuksel Guran, akasi Enes Guran va amakisi Salim Guran “bolani birgalikda qasddan o‘ldirish“ aybi bilan afv etish huquqisiz umrbod qamoq jazosiga hukm qilingan. Kassatsiya sudining Birinchi jinoyat palatasi uch nafar ayblanuvchiga nisbatan chiqarilgan umrbod qamoq hukmlarini o‘z kuchida qoldirgan.

Nevzat Baxtiyorning jazosi keskin og‘irlashtirilgan

Kassatsiya sudi Narinning jonsiz tanasini boshqa joyga olib o‘tgani uchun “jinoyat izlarini yo‘q qilish, yashirish yoki o‘zgartirish” moddasi bilan 4 yil 6 oyga ozodlikdan mahrum etilgan Nevzat Baxtiyorga nisbatan chiqarilgan hukmni bekor qilgan.

Ish qayta ko‘rilgan sud majlisida Baxtiyor “og‘irlashtirilgan qasddan qotillikka sheriklik qilish“ aybi bilan 17 yilga ozodlikdan mahrum etilgan. Sud qarorining asoslantiruvchi qismida Baxtiyor Narinning o‘ldirilishiga yordam bergan, degan xulosaga kelingani qayd etilgan. Narinning vafot etganiga ikki yil to‘lgan bo‘lsa-da, uning oilasining adolat talablari va sud jarayoniga oid bahslar yana kun tartibiga chiqmoqda.