2 йил олдин ўлдирилган Нариннинг иши қайта кўрилиши мумкин

2024 йил 21 август куни Диёрбакирда ғойиб бўлганидан 19 кун ўтиб жонсиз танаси топилган саккиз ёшли Нарин Гуран вафотининг иккинчи йилида қабри бошида хотирланди. Маросимда унинг оиласи ва кўплаб фуқаролар иштирок этди. Бу ҳақда “Haberler“ хабар берди.

Нарин Гураннинг отаси Ариф Гуран: “Улар бошимизга қиёматни солишди”, дея суд жараёнига норозилик билдириб, яна адолат талаб қилган.

Нариннинг хотираси ёд этилди

Қайд этилишича, Нарин Гуран вафотининг иккинчи йили муносабати билан қабри бошида ёд этилган. Бағлар туманининг Тавшантерепе маҳалласида ташкил этилган хотира дастурида Нариннинг оила аъзолари, сиёсий партиялар ва нодавлат нотижорат ташкилотлари вакиллари, шунингдек, кўплаб фуқаролар иштирок этган. Дастур давомида Қуръон тиловат қилиниб, мавлуд ва дуолар ўқилган, шунингдек, Нариннинг қабри устига чиннигуллар қўйилган. Хотира маросимидан сўнг оила аъзолари ва иштирокчилар Нариннинг қабристонидан унинг ғойиб бўлишидан олдин охирги марта кўрилган ҳудудгача пиёда юришган.

Отаси адолат талаб қилди

Хотира маросимида сўзлаган ота Ариф Гуран оиласи бошидан кечираётган оғриқни тасвирлаб бўлмаслигини айтиб, адолат талаб қилган.

“Бугун биз учун қиёмат куни. Улар бошимизга қиёматни солишди. Бизни тириклайин кўмиб юборишди“, деган қизнинг отаси.

У қизининг ўлимига масъул деб ҳисоблайдиган Невзат Бахтиёр ҳақида гапирар экан, тергов ва суд жараёни оила учун катта фожиага айланганини таъкидлаган.

“Бизни қамоқдан чиқарманг. Қизим учун адолатга эришинг. Қизимнинг қони ерда қолмоқда“, деган Гуран.

Ишни қайта кўриш талаби янгради

Хотира дастурида сўзга чиққан Халқлар тенглиги ва демократия партиясининг Кожаэли вилоятидан депутати Ўмер Фарук Гергерлиўғлу ҳам Нарин Гуран иши бўйича суд жараёнини танқид қилган.

Гергерлиўғлу мазкур иш бўйича ҳуқуқий жараён қайта кўриб чиқилиши зарурлигини айтиб, суд ишини янгидан кўришга чақирган. Унинг таъкидлашича, иш жамоатчилик босими ёки оммавий ахборот воситаларидаги баҳслар асосида эмас, балки далиллар ва қонун асосида юритилиши керак.

Жасад 19 кундан кейин топилган

8 ёшли Нарин Гуран 2024 йил 21 август куни Тавшантерепе маҳалласидаги уйидан Қуръон курсига бориш учун чиқиб кетган ва шундан кейин ундан дарак бўлмаган. Қарийб 2 минг киши иштирок этган қидирув ишлари бошланганидан 19 кун ўтиб, 2024 йил 8 сентябрь куни Нариннинг жонсиз танаси Эгертутмаз дарёсидан топилган.

Она, ака ва амаки умрбод қамоқ жазосига ҳукм қилинган

Нарин Гуран қотиллиги иши бўйича онаси Юксел Гуран, акаси Энес Гуран ва амакиси Салим Гуран “болани биргаликда қасддан ўлдириш“ айби билан афв этиш ҳуқуқисиз умрбод қамоқ жазосига ҳукм қилинган. Кассация судининг Биринчи жиноят палатаси уч нафар айбланувчига нисбатан чиқарилган умрбод қамоқ ҳукмларини ўз кучида қолдирган.

Невзат Бахтиёрнинг жазоси кескин оғирлаштирилган

Кассация суди Нариннинг жонсиз танасини бошқа жойга олиб ўтгани учун “жиноят изларини йўқ қилиш, яшириш ёки ўзгартириш” моддаси билан 4 йил 6 ойга озодликдан маҳрум этилган Невзат Бахтиёрга нисбатан чиқарилган ҳукмни бекор қилган.

Иш қайта кўрилган суд мажлисида Бахтиёр “оғирлаштирилган қасддан қотилликка шериклик қилиш“ айби билан 17 йилга озодликдан маҳрум этилган. Суд қарорининг асослантирувчи қисмида Бахтиёр Нариннинг ўлдирилишига ёрдам берган, деган хулосага келингани қайд этилган. Нариннинг вафот этганига икки йил тўлган бўлса-да, унинг оиласининг адолат талаблари ва суд жараёнига оид баҳслар яна кун тартибига чиқмоқда.