Husiylar Tel-Avivga raketa hujumi uyushtirdi

Yaman hududidan uchirilgan raketa Isroil poytaxti Tel-Aviv hududiga tushdi. Bu haqda “Al Jazeera”  xabar berdi.

Qayd etilishicha, Isroilning “Temir gumbaz” tizimi yamanlik husiylar tomonidan Tel-Avivga yo‘llangan ballistik raketani ushlab qola olmagan. Snaryad shahar markazidagi bolalar maydonchasiga qulagan.

Nashrga ko‘ra, raketa 8 ta turarjoy binolaridan iborat kompleksga tushgan. Hodisa joyiga yong‘in o‘chirish guruhlari yuborilgan. Falokat joyi o‘rab olinib, hozirda politsiya va harbiy razvedka mutaxassislari ishlamoqda. Politsiya aholini hodisa joyidan uzoq turishga va xavfsizlik organlarining ko‘rsatmalariga rioya qilishga chaqirdi.

SAHAL Isroil markazida havo ogohlantirishlari eshitilgandan so‘ng, raketani yo‘q qilishga uringan, ammo bu muvaffaqiyatsizlik bilan tugagan.

Ma’lumot uchun, bir kun avval, 20 dekabr kuni G‘azoda tibbiyot xodimlari Isroil havo hujumlari oqibatida kamida 25 falastinlik halok bo‘lganini aytgandi.

Eslatib o‘tamiz, avvalroq Isroil Yamanning husiylar nazoratidagi qismlaridagi portlar va energetika infratuzilmasiga zarbalar bergan va Eron bilan hamkorlik qilgan bir necha guruhlarga yana hujumlar uyushtirish bilan tahdid qilgandi.