Hindistonda vertolyot quladi. Qurbonlar bor (video)

Kecha, 5 yanvar kuni Hindistonda Qirg‘oq qo‘riqlash vertolyotining qulashi oqibatida uch kishi halok bo‘ldi. Bu haqda “Press trust of India” axborot nashri xabar berdi.

Qayd etilishicha, G‘arbiy Gujarat shtatida Qirg‘oq qo‘riqlash vertolyoti o‘quv missiyasi vaqtida halokatga uchragan. Voqea Porbandar shahridagi Sohil xavfsizlik xizmati mas’uliyati ostidagi hududda sodir bo‘lgan.

Porbandar shahri politsiya boshlig‘ining aytishicha, vertolyot odatiy chiqishdan qaytib, uchish-qo‘nish yo‘lagiga qo‘nmoqchi bo‘lganida qulagan. Bortda uch kishi bo‘lib, hammasi vafot etgan. Hindiston qirg‘oq qo‘riqlash xizmati hodisa bilan bog‘liq vaziyatni o‘rganmoqda.

Eslatib o‘tamiz, 1 yanvar kuni Turkiyaning Isparta viloyatidan havoga ko‘tarilgan o‘quv samolyoti Dengizli viloyatining Chal shahrida majburiy qo‘nish payti halokatga uchragandi.  Dalaga teskari qulagan samolyot  halokatida hech qanday inson talafoti qayd etilmagan bo‘lsa-da, uchuvchi Shukru Yigit Devebajak yengil tan jarohati bilan hududdagi tibbiyot xodimlari tomonidan ko‘rsatilgan yordamdan so‘ng Chal davlat shifoxonasiga olib borilgan.

Mohimbegim Ma’rufaliyeva