Hibsga olingan bokschi va bekor qilingan katta janglar – Sport dayjesti

Bugun Yevropada boshlangan katta futbol bayrami, Jahon chempionati sari mag‘lubiyatsiz odimlayotgan O‘zbekiston terma jamoasi va 4 ta kamar uchun jang qiladigan Murodjon Ahmadaliyev haqida gaplashamiz. Assalomu alaykum. QALAMPIR.UZ’da sport dayjesti.
Mahmud Murodov Octagon MMA bilan shartnoma tuzdi.

O‘zbekistonlik aralash yakkakurash ustasi Mahmud Murodov Chexiya va Slovakiya davlatlarida janglar tashkil etadigan Octagon MMA ligasi bilan shartnoma imzoladi. Bu haqda liga o‘zining ijtimoiy tarmoqdagi sahifasida xabar berdi.

O‘z vaqtida 34 yoshli Murodov aynan mazkur ligada janglar o‘tkazgan. U 2019 yilda Octagon MMA ligasining 2 ta turnirida qatnashib, Alberto Pereyra Uda va Uendell Oliveyra Markes kabi jangchilarni nokautga uchratgan.

Qayd etish joiz, Mahmud Murodov may oyida UFCʼdagi oxirgi janglarini bekor qilgani bois tashkilotdan chetlatilgandi.

Ma’lumot uchun, Octagon MMA ligasi 2016 yilda tashkil topgan. Hozirda tashkilotning ijtimoiy tarmoqlar va YouTube’da 450 ming dan ortiq obunachilari bor.

Amerikalik mashhur bokschi hibsga olindi

Amerikalik bokschi Rayan Garsiya Kaliforniya shtati Beverli-Xillz shahrida buzg‘unchilikda ayblanib, hibsga olindi. Bu haqda ESPN xabar berdi.

Sportchi yashayotgan mehmonxona uni 15 ming dollardan oshiq mulkka zarar yetkazganlikda ayblaganidan so‘ng, Garsiya 8 iyun kuni hibsga olingan. Hibsga olinganidan keyin Garsiya sog‘lig‘i bilan bog‘liq muammolardan shikoyat qildi. So‘ngra u davolanish uchun shifoxonaga yotqizildi. 

Garsiyaning advokati Darin Chavesning aytishicha, bokschi onasining sog‘lig‘i bilan bog‘liq muammolar tufayli og‘ir kunlarni boshdan kechirmoqda.

“Rayan ko‘p yillar davomida ruhiy salomatlik bilan bog‘liq kurashlar haqida ochiq gapirdi. Ayni paytda qattiq stressda. Muxlislar va jamoatchilikning qo‘llab-quvvatlashi unga shaxsiy muammolarini yengishda juda muhim. Rayanni qo‘ldan kelgancha qo‘llab-quvvatlang. Bizning jamoamiz unga kerakli yordamni ko‘rsatadi”, deydi Chaves.

Ma’lumot uchun, Garsiya 25 yoshda. Uning professional ringdagi hisobida 25 g‘alaba va bitta mag‘lubiyati bor. May oyida sportchi Jahon boks kengashi (WBC) versiyasi bo‘yicha sobiq chempion Devin Xeyniga qarshi jang qilib, g‘alaba qozongandi.

Eron-O‘zbekiston o‘yinida hisob ochilmadi

 11 iyun kuni futbol bo‘yicha Jahon chempionati saralashi doirasida Eron-O‘zbekiston bahsi bo‘lib o‘tdi.

“E” guruhi g‘olibligi uchun Tehrondagi "Ozodiy" stadionida kechgan bahs nursiz durang bilan yakunlandi. Shunday qilib, O‘zbekiston ham, Eron ham bir xil 14 ochko jamg‘arib, saralashning 3-raundiga yo‘l oldi.

Eron to‘plar nisbatining yaxshiligi bois guruhda 1-o‘rinni band etdi. Endi jamoalar 3-raundda uch guruhga bo‘lingan holda Jahon chempionati yo‘llanmasi uchun bahs olib boradi.

Ma’lumot uchun, 3-bosqich o‘yinlari sentyabr oyida start oladi. Osiyodan Jahon chempionatiga 8 jamoa to‘g‘ridan to‘g‘ri yo‘llanmani qo‘lga kiritadi. Yana bitta jamoa esa yarimta yo‘llanma uchun kurashadi.

Rasman: WBA Naoya Inoue – Murodjon Ahmadaliyev jangiga buyruq berdi

Butunjahon boks assotsiatsiyasi (WBA ) ikkinchi eng yengil vazn toifasi chempioni, yaponiyalik Naoya Inouega o‘zbekistonlik Murodjon Ahmadaliyevdan majburiy himoya jangi o‘tkazishga buyruq berdi. Bu haqda O‘zbekiston Professional boks federatsiyasi matbuot xizmati xabar berdi.

Tashkilot tomonlarga rasmiy maktub yuborib, har ikki jamoaga muzokara uchun 30 kun muhlat berdi. Tomonlar 14 iyulga qadar jang borasida kelishuvga erishishi kerak.

Reglamentga ko‘ra, chempion kamarni qo‘lga kiritgan kundan boshlab 9 oy ichida mavjud bo‘lgan eng yaxshi da’vogarga qarshi unvonini himoya qilishi kerak.

Inoue 2023 yilning 26 dekabrida chempionlikni qo‘lga kiritgan va uning majburiy himoyasi shu yilning 25 sentyabridan kechiktirmay o‘tkazilishi kerak. WBA yo‘nalishidagi majburiy da’vogar esa aynan o‘zbekistonlik Murodjon Ahmadaliyev bo‘lib turibdi.

Agar belgilangan muddatda kelishuvga erishilmasa, promouterlar o‘rtasida ochiq kim oshdi savdosi o‘tkaziladi.

Ma’lumot uchun, WBA va IBF yo‘nalishlarida sobiq jahon chempioni Murodjon Ahmadaliyev hozirda AQSHda mashg‘ulotlarni davom ettirmoqda.

Makregor-Chendler jangi bekor qilindi

Mashhur irlandiyalik MMA jangchisi, yengil va eng yengil vazn toifasida sobiq ikki karra UFC chempioni Konor Makgregor hamda 70 kg vazn toifasida sobiq UFC chempioni amerikalik Maykl Chandler o‘rtasidagi jang rasman bekor qilindi. Bu haqda tashkilot rahbari Dana Uayt ijtimoiy tarmoqdagi sahifasida ma’lum qildi.

Makgregor va Chandler o‘rtasidagi jang 29 iyun kuni Las-Vegasda UFC 303 turnirida bo‘lib o‘tishi kerak edi.

3 iyun kuni liga rahbariyati Dublinda Konor Makgregor va Maykl Chandler ishtirok etishi kerak bo‘lgan matbuot anjumanini bekor qildi, bu esa jangning ehtimoliy bekor qilinishi mumkinligi haqidagi mish-mishlarga sabab bo‘ldi va yakunda to‘qnashuv haqiqatdan ham bekor qilindi.

Ma’lumot uchun, Makgregor oxirgi marta Dastin Porega qarshi ikkita jang o‘tkazgan. 2021 yil yanvarida irlandiyalik ikkinchi raundda nokaut bilan yutqazgan, o‘sha yilning iyul oyida o‘tkazilgan bahsda esa Konor birinchi raundda texnik nokautga uchragan.

Chechenistonlik yengilmas jangchi Hamzat Chimayev shifoxonaga yotqizildi. Bu haqda yana bir MMA jangchisi Muhammad Eskerxonov Instagram sahifasi orqali ma’lum qildi.

“Har bir qiyinchilikdan keyin yengillik keladi”, deb yozgan Eskerxonov.

Qayd etish joiz, Chimayev 22 iyun kuni Saudiya Arabistonida bo‘lib o‘tadigan UFC turnirida avstraliyalik Robert Uittaker bilan jang o‘tkazishi kerak edi, biroq Hamzat jarohat olgani bois jang bekor qilindi. 

30 yoshli Chimayev MMA'dagi faoliyati davomida jami 13 ta jang o‘tkazib, barchasida g‘alaba qozongan. Chimayev olti marta raqiblarini nokaut bilan mag‘lub etgan. O‘tgan yilning oktyabr oyida UFC 294 turniri doirasida bo‘lib o‘tgan so‘nggi jangida sportchi Kamaru Usmon bilan to‘qnash kelib, hakamlar qaroriga ko‘ra raqibidan ustun kelgan. 33 yoshli Uittaker hisobida 25 g‘alaba va 7 mag‘lubiyat bor.

Nodirbeklar kurashida g‘olib aniqlandi

Toshkentda bo‘lib o‘tgan “Uzchess Cup” turnirida Nodirbek Yoqubboyev oxirgi turdagi durangdan so‘ng “Masters” guruhida chempionlikni qo‘lga kiritdi.

Turnirning so‘nggi turida Nodirbek Yoqubboyev xitoylik Yuy Yan I bilan durang o‘ynadi. Shu tariqa Yoqubboyev 5,5 ochko bilan  “Masters” guruhida chempion bo‘ldi va 25 ming dollar mukofot pulini qo‘lga kiritdi.

2-o‘rinni egallagan Nodirbek Abdusattorov ham chempion bilan bir xil natija qayd etdi, lekin qo‘shimcha natijalarga ko‘ra u Nodirbek Yoqubboyevga 1- o‘rinni boy berdi. 2-o‘rinni egallagan Nodirbek Abdusattorov 20 ming dollar, 3-o‘rinni qo‘lga kiritgan xitoylik Yuy Yan I esa 15 ming dollar mukofot puli oldi.

Ma’lumot uchun, 6 iyunda boshlangan mazkur turnir o‘tgan yili dekabr oyida Samarqandda bo‘lib o‘tgan shaxmat bo‘yicha Jahon chempionatidan so‘ng, O‘zbekistonda o‘tkazilgan eng yirik shaxmat turniri hisoblanadi. Turnirning umumiy mukofot miqdori 166 ming AQSH dollarini tashkil etdi. Musobaqada  “Masters”, “Challengers” va “Futures” guruhlari bo‘yicha reytingi 2500 dan yuqori shaxmatchilar ishtirok etdi.

O‘zbekistonda o‘tadigan futzal Jahon chempionatining o‘yinlar mundarijasi e’lon qilindi

Shu yilning 14 sentyabridan 6 oktyabriga qadar O‘zbekistonning 3 ta shahri Toshkent, Buxoro va Andijonda o‘tkaziladigan futzal bo‘yicha Jahon chempionatining o‘yinlari o‘tkazilish vaqti belgilandi. Bu haqda Xalqaro futbol federatsiyasi (FIFA) o‘z rasmiy saytida xabar berdi. 

Manbaga ko‘ra, deyarli barcha o‘yinlar mahalliy vaqt bilan 17:30 va 20:00 da start oladi. Musobaqaning dastlabki ikki kunidagi 2 ta o‘yin boshlanishi soat 15:00 ga belgilangan. Yarim finallar va finalga start hushtagi ham 20:00 da chalinishi ko‘zda tutilgan.

Ispaniyalik mutaxassis Xose Venansio Lopes murabbiyligidagi O‘zbekiston milliy terma jamoasi guruh bosqichidagi barcha o‘yinlarini Toshkent shahridagi “Humo arena”da o‘tkazadi. 

“A” guruhidan joy olgan “oq bo‘rilar”ga Niderlandiya, Paragvay va Kosta-Rika raqiblik qiladi.