Harris siyosiy maydonga qaytib, Trampni keskin tanqid qildi

Kecha, 30 aprel kuni AQSHning sobiq vitse-prezidenti Kamala Harris San-Fransiskodagi demokratlar auditoriyasi oldida nutq so‘zlab, Donald Trampning prezidentlikdagi ilk 100 kunini tanqid ostiga oldi va bu davrni “Amerikaning eng oliy qadriyatlaridan ommaviy voz kechishi” davri deb atadi. Mazkur bayonot Harrisning lavozimdan ketganidan buyon qilgan eng muhim siyosiy chiqishi bo‘ldi. Bu haqda “The Guardian” xabar berdi.

Harris o‘z nutqida Trampning keskin siyosiy dasturiga qarshi chiqayotgan rahbarlar va institutlarni olqishlagan. Ular jasorat bilan harakat qilayotgan Kongress a’zolari, qonun ustuvorligini himoya qilayotgan sudyalar, Tramp ma’muriyatining konstitutsiyaga zid talablari bilan kurashayotgan universitetlar hamda ijtimoiy ta’minotni himoya qilish uchun safarbar bo‘layotgan oddiy amerikaliklar.

“Bu chiqish Harrisning Tramp ikkinchi muddatga qaytganidan beri eng kuchli siyosiy qaytishi bo‘ldi. U hozirda Los-Anjelesda yashaydi va siyosiy faoliyatining navbatdagi bosqichi – 2026 yilda Kaliforniya gubernatorligiga nomzodlik yoki 2028 yilda prezidentlik uchun yana kurashga qo‘shilish ustida o‘ylamoqda”, deyiladi xabarda.

U Trampni qo‘rquv va betartiblikni ataylab uyg‘otib, shaxsiy hokimiyatini mustahkamlashda ayblagan.

“Ular ayrim odamlarni qo‘rqitish orqali boshqalarga ham sovuq ta’sir o‘tkaza olamiz, deb o‘ylashmoqda. Ammo ular unutib qo‘ygan narsa bor: faqat qo‘rquv emas, jasorat ham yuqumli”, dedi Harris.

U amerikaliklarni birlashishga, siyosatga kirishga, asosiy huquq va qadriyatlar uchun kurashishga chaqirgan.

“Keling, mana shuni mustahkamlaylik”, dedi u.

Harris bu nutqni Emerge America tashkilotining San-Fransiskodagi Palace Hotel mehmonxonasida bo‘lib o‘tgan 20 yillik yubiley tadbirida aytgan. Tashkilot aynan Harris 2003 yilda San-Fransisko prokurorligiga nomzod bo‘lganidan keyin demokrat ayollarni siyosiy lavozimlarga tayyorlash uchun tuzilgan. Harris bu tashkilotni e’tirof etib, undagi ayollarning kuchli liderlik salohiyatini yuqori baholagan.

Tadbirda Kaliforniya vitse-gubernatori Eleni Kounalakis va Kongressning sobiq a’zosi Keti Porter ham ishtirok etgan. Ularning ikkalasi ham gubernatorlikka da’vogarlik qilmoqchi.

Harris o‘z chiqishida Trampning ikkinchi muddatining tartibsiz boshlanishi tasodifiy emas, balki “Project 2025” deb nomlangan konservativ siyosiy reja asosida amalga oshirilayotganini aytgan.

“Bu shunchaki betartiblik emas. Bu o‘n yilliklar davomida tayyorlangan dastur juda tez va qat’iy joriy etilayotganining natijasi”, dedi u.

U Trampning federal hukumatni qisqartirish harakatlari, irqiy va gender tenglik siyosatiga qarshi yuritayotgan kurashini tanqid qilgan.

“Trampning buzg‘unchi tariflari mamlakatni ochiqdan-ochiq inqirozga yetaklamoqda. Aynan shunday bo‘lishini bashorat qilgan edim”, dedi u bu borada ilgari saylov kampaniyasida bergan ogohlantirishlariga ishora qilib.

Ma’lum bo‘lishicha, bir kun avval Tramp ma’muriyati Harrisning turmush o‘rtog‘i Dug Emxoffni va boshqa Bayden davridagi yuqori martabali amaldorlarni AQSH Xolokost Memorial muzeyi boshqaruv kengashidan haydagan. Emxoff bu qarorga qarshi bo‘lgan va Oq uy bilan bo‘lgan mojaroda ham faol qatnashgan. Harris bu voqeani bevosita tilga olmagan bo‘lsa-da, “konstitutsiyaga zid tahdidlarga bo‘ysunayotganlar” haqida aytgan gapi bilan bunga ishora qilgan.

Kaliforniya kabi yirik demokrat shtatni boshqarish Harrisga Trampga qarshi liberal qadriyatlar asosida kurashish uchun kuchli minbar bo‘lishi mumkin. Kaliforniya sobiq bosh prokurori va senator sifatida Harris yoz oxirigacha bu borada qaror qabul qilishi kutilmoqda.

Eslatib o‘tamiz, 15 aprel kuni AQSH sobiq prezidenti Jo Bayden lavozimini tark etganidan beri ilk bor omma oldida nutq so‘zlab, amaldagi Prezident Donald Trampni keskin tanqid qilgandi.