Байден президентликдан кетганидан кейин илк бор омма олдида чиқиш қилди

Кеча, 15 апрель куни АҚШ собиқ президенти Жо Байден лавозимини тарк этганидан бери илк бор омма олдида нутқ сўзлаб, амалдаги Президент Дональд Трампни кескин танқид қилди. Бу ҳақда CNN хабар берди.

Телеканалнинг қайд этишича, Байден Чикагода АҚШнинг ногиронлар, юристлар ва маслаҳатчилар миллий конференциясида (ACRD) сўзга чиққан. Байден ўз нутқида Дональд Трампнинг исмини тилга олмаган бўлса-да, ижтимоий таъминот бошқармасидаги қисқартиришлар ва ўзгаришлардан норозилигини билдирган.

“Ҳозир нима бўлаётганига қаранг. Янги маъмурият атиги 100 кун ичида шунча зарар етказди, шунча нарса бузилди. Бу қандай тез содир бўлаётгани одамни ҳайратга солади”, дейди Байден.

Унинг айтишича, янги Президент ҳокимиятга келганидан бери дастлабки уч ой ичида ижтимоий соҳада 7 минг киши ишдан бўшатилган.

Байден федерал иш ўринлари ва харажатларни қисқартириш кампаниясини олиб бораётган шахсни (айниқса Илон Маскни) бевосита тилга олмаган ҳолда, янги маъмуриятдаги “технологик стартаплар” маданиятини танқид қилган.

“Ўзингиздан сўрашингиз керак: нега бу содир бўляпти? Нега улар энди ижтимоий таъминот тизимига ёпишиб олишган? Улар уни йўқ қилмоқчи, сўнг эса таламоқчи. Улар нима учун уни таламоқчи? Чунки миллиардерларга ва йирик корпорацияларга улкан солиқ имтиёзларини беришмоқчи, уларни қўллаб-қувватламоқчи”, деган собиқ президент.

Шунга қарамай, Байден нутқида бирлашишга чақириб, мамлакат ҳеч қачон бугунгидек икки қутбли бўлмаганини таъкидлаган.

“Биз ҳозиргидек бўлинган халқ сифатида давом эта олмаймиз. Мен бу иш билан узоқ йиллардан бери шуғулланаман, лекин ҳеч қачон бунчалик чуқур бўлинишни кўрмаганман”, деган Байден.

CNN маълумотига кўра, Байденнинг бу чиқиши демократлар бутун мамлакат бўйлаб ижтимоий ёрдам дастуридаги эҳтимолий қисқартиришларга қарши умумхалқ норозилик акцияларини ташкил қилаётган бир пайтга тўғри келган. Акциялар АҚШнинг турли ҳудудларида ўтказилиши режалаштирилган.

Эслатиб ўтамиз, аввалроқ Дональд Трамп собиқ президент Жо Байденнинг махфий маълумотларни олиш ваколатини унинг хавфсизлик рухсатини бекор қилиш ва кундалик разведка брифингларини тўхтатиш орқали олиб ташлашини айтганди.