HAMAS va Isroil tinchlik kelishuviga yaqin

HAMAS va Isroil gumanitar tinchlik o‘rnatish bo‘yicha kelishuvga yaqin turibdi. Bu haqda mashhur arab telekanallari "Al Arabiya" va "Al Hadath" o‘z manbalariga tayanib, xabar bermoqda.

Unga ko‘ra, ma’lum shartlar asosida 48 soat ichida HAMAS harakati va Isroil o‘rtasida uch kunlik tinchlik kelishuvi tuzilishi mumkin.

Buning uchun HAMAS Isroil tomonidan hibsda saqlanayotgan 50 nafar falastinlik evaziga xuddi shuncha garovga olinganlarni ozod qilishi kerak. 

Bundan tashqari, BMT nazoratida G‘azo sektoriga yoqilg‘i va gumanitar yordam yetkazib berish ham ko‘zda tutilgan.

Telekanal insayderlarining qo‘shimcha qilishicha, AQSH Tel-Avivga ushbu kelishuvni ma’qullash uchun bosim o‘tkazmoqda.

Ma’lumot o‘rnida, Isroil va HAMAS o‘rtasidagi urush 41 kundan buyon tingani yo‘q. 

Avvalroq, Isroil kuchlari “Ash-Shifa” shifoxonasidagi barchaga, jumladan, shifokorlar, bemorlar va ko‘chirilganlarga tibbiy majmuani evakuatsiya qilish uchun bir soat vaqt bergani haqida yozgandik.