Журналист Қудрат Ирназаров вафот этди

Тарих фанлари доктори, фахрий журналист Қудрат Ирназаров 73 ёшида вафот этди. Бу ҳақда Журналистлар уюшмаси Ахборот хизмати хабар берди.

Қудрат Ирназаров 1950 йилда Тошкент шаҳрида туғилган. Турли йилларда газета мухбири, тарих кафедраси ўқитувчиси, мудири, Миллий университетда декан каби лавозимларда фаолият юритган.

2019 йилдан ҳозирги кунгача Ўзбекистон журналистика ва оммавий коммуникациялар университети Ижтимоий ва гуманитар фанлар кафедраси профессори, кейинроқ Жамоатчилик билан алоқалар ва реклама кафедраси профессори сифатида ишлаб келган. У 2008 йилда "Меҳнат шуҳрати" ордени билан тақдирланган.

Шунингдек, Ўзбекистон журналистика ва оммавий коммуникациялар университети ректори Шерзодхон Қудратхўжа ўзининг ижтимоий тармоқдаги саҳифасида Қудрат Ирназаров фидойи педагог ва сермаҳсул олим сифатида Ўзбекистон ОАВ ривожига муносиб ҳисса қўшганини айтиб ўтган.