Жокович теннисда қоидаларни ўзгартиришни таклиф қилди

24 карра “Катта дубулға” турнири ғолиби Новак Жокович теннис ўйинлари форматига ўзгартиш киритиш таклифини илгари сурди. Бу ҳақда Жокович “Punto de Break” нашрига берган интервьюсида сўз очди.

“Биз ҳисоб тизимини ўзгартиришимиз керак. Ҳар бир сет 6 та геймгача эмас, 4 та геймгача ўйналса. Балки ҳал қилувчи очко қоидасини жорий этиб, учрашувларни уч сетлик форматда қолдириш мумкин. Ўйинлар икки соатдан кам вақт давом этиши керак. Менимча, бу барча учун энг яхши ечим бўлади”, дейди Жокович.

Аввалроқ, сербиялик теннисчи АҚШда бўлиб ўтадиган “Cincinnati Masters” турнирида иштирок этишини тасдиқлаган эди. Мусобақа жорий йилнинг 13-23 август кунлари ўтказилади.

Жокович ушбу турнирда сўнгги марта 2023 йилда иштирок этган ва финалда испаниялик Карлос Алкарасни мағлуб этган. Сербиялик юлдуз фаолияти давомида “ Cincinnati Masters” турнирида уч марта – 2018, 2020 ва 2023 йилларда чемпионликни қўлга киритган.