WTA жиддий молиявий муаммоларга дуч келмоқда – ОАВ

Аёллар теннис ассоциацияси (WTA) жиддий молиявий муаммоларга дуч келиш хавфи остида. Бу ҳақда “The Telegraph” нашри хабар берди.

Манбага кўра, WTA йил охирига бориб ҳисобида атиги 15 миллион доллар нақд маблағ қолиши мумкин. 2026 йилда ташкилотнинг операцион зарарлари 23 миллион долларга етиши прогноз қилинмоқда. Агар ушбу тенденция давом этса, WTA ҳисоблари 2027 йил кузига келиб салбий кўрсаткичга тушиши мумкин.

Молиялаштиришдаги тақчилликнинг катта қисми WTA’нинг Саудия Арабистонида финал турнирини ўтказиш бўйича уч йиллик шартномасининг муддатидан олдин бекор қилиниши билан боғлиқ.

Ташкилот учун яна бир муаммо хусусий инвестиция компанияси CVC томонидан молиялаштиришнинг тўхтатилиши бўлиши мумкин. 2023 йилда WTA ўзининг тижорий ҳуқуқларининг 20 фоизини беш йил муддатга 150 миллион долларга сотган. Бироқ келишув доирасидаги 30 миллион доллар 2027 йилда олиниши керак.

Вазият WTA’нинг мукофот пулини тенглаштириш сиёсати билан янада мураккаблашмоқда. Ташкилот ҳар йили аёллар теннисидаги қўшма турнирлардаги мукофот пуллари ўртасидаги фарқни қоплаш учун тахминан 25 миллион фунт стерлинг сарфлайди. Бундай турнирларда аёллар учун мукофот жамғармаси эркакларникининг атиги 40 фоизини ташкил этади.

“The Telegraph” хабар беришича, Индиан-Уэллсда ўтказилиши режалаштирилаётган WTA финал турнирининг мукофот жамғармаси ўтган йили Ар-Риёдда бўлиб ўтган мусобақага нисбатан тахминан учдан бир қисмга кам бўлиши мумкин.

Маълумот учун, WTA президенти лавозимини Валери Камилло эгаллаб келмоқда. У мазкур лавозимга 2025 йил ноябрь ойида тайинланган.