WTA jiddiy moliyaviy muammolarga duch kelmoqda – OAV

Ayollar tennis assotsiatsiyasi (WTA) jiddiy moliyaviy muammolarga duch kelish xavfi ostida. Bu haqda “The Telegraph” nashri xabar berdi.

Manbaga ko‘ra, WTA yil oxiriga borib hisobida atigi 15 million dollar naqd mablag‘ qolishi mumkin. 2026 yilda tashkilotning operatsion zararlari 23 million dollarga yetishi prognoz qilinmoqda. Agar ushbu tendensiya davom etsa, WTA hisoblari 2027 yil kuziga kelib salbiy ko‘rsatkichga tushishi mumkin.

Moliyalashtirishdagi taqchillikning katta qismi WTA’ning Saudiya Arabistonida final turnirini o‘tkazish bo‘yicha uch yillik shartnomasining muddatidan oldin bekor qilinishi bilan bog‘liq.

Tashkilot uchun yana bir muammo xususiy investitsiya kompaniyasi CVC tomonidan moliyalashtirishning to‘xtatilishi bo‘lishi mumkin. 2023 yilda WTA o‘zining tijoriy huquqlarining 20 foizini besh yil muddatga 150 million dollarga sotgan. Biroq kelishuv doirasidagi 30 million dollar 2027 yilda olinishi kerak.

Vaziyat WTA’ning mukofot pulini tenglashtirish siyosati bilan yanada murakkablashmoqda. Tashkilot har yili ayollar tennisidagi qo‘shma turnirlardagi mukofot pullari o‘rtasidagi farqni qoplash uchun taxminan 25 million funt sterling sarflaydi. Bunday turnirlarda ayollar uchun mukofot jamg‘armasi erkaklarnikining atigi 40 foizini tashkil etadi.

“The Telegraph” xabar berishicha, Indian-Uellsda o‘tkazilishi rejalashtirilayotgan WTA final turnirining mukofot jamg‘armasi o‘tgan yili Ar-Riyodda bo‘lib o‘tgan musobaqaga nisbatan taxminan uchdan bir qismga kam bo‘lishi mumkin.

Ma’lumot uchun, WTA prezidenti lavozimini Valeri Kamillo egallab kelmoqda. U mazkur lavozimga 2025 yil noyabr oyida tayinlangan.