Ўзбекистоннинг биринчи ракеткаси ўзгарди

Аёллар тенниси ассоциацияси (WTA) теннисчилар рейтингини янгилади. Унда ўзбекистонлик 22 ёшли теннисчи Мария Тимофеева 63-ўринга кўтарилиб, Ўзбекистоннинг биринчи ракеткасига айланди.

Бу кўрсатгич Мария Тимофеева фаолиятидаги энг яхши натижа ҳисобланади. Унинг аввалги шахсий рекорди 68-ўрин эди.
Мария Пекинда ўтказилган WTA 1000 турнирида саралаш босқичидан муваффақиятли ўтиб, учинчи босқичга қадар етиб борди. Ушбу натижа теннисчига 135 рейтинг очкосини тақдим этди ва шахсий рекордини янгилашига ёрдам берди.

Аввал Ўзбекистоннинг биринчи ракеткаси Камилла Раҳимова ҳисобланган. Янги рейтингда Камилла 69-ўринни эгаллаган бўлса, Мария 63-поғонага кўтарилди. Шу тариқа, Мария Тимофеева Ўзбекистон аёллар терма жамоасининг биринчи ракеткасига айланди.

Ўзбекистоннинг учинчи ракеткаси Полина Кудерметова эса 2 поғона юқорилаб, 102-ўринга кўтарилди.

WTA юқори учлигида ўзгариш кузатилди. Биринчи ўринда жорий йилги мавсум “US Open” чемпионлигини қўлга киритган Елена Рибакина бораётган бўлса, иккинчи ўринни беларуслик Арина Соболенко банд этган. Кучли учликдан эса 2 поғона кўтарилишга эришган россиялик Мирра Андреева жой олган.