Надаль теннисдан кетганидан сўнг илк бор кортга қайтади

Испаниялик собиқ теннис юлдузи Рафаэль Надаль ўз теннис академиясининг 10 йиллиги муносабати билан профессионал спортдаги фаолиятини якунлаганидан сўнг илк бор кўргазмали ўйинларда иштирок этади. Бу ҳақда академия матбуот хизмати хабар берди.

Испаниялик спортчи номлари ҳозирча ошкор этилмаган бир нечта таниқли спортчилар билан бирга қатор кўргазмали учрашувларда майдонга тушади. Бу Надаль 2024 йил кузида профессионал теннисдаги фаолиятини якунлаганидан кейин мухлислар олдида ракетка ушлаши билан боғлиқ илк тадбир бўлади. Хабарларга кўра, кўргазмали турнирни жорий йилнинг 3 октябрь куни бошлаш режалаштирилган.

Маълумот учун, 40 ёшли Надаль фаолияти давомида 22 та “Катта дубулға” турнирида ғолиб чиққан. Унинг ҳисобида “Ролан Гаррос”даги рекорд даражадаги 14 та чемпионлик ҳам бор. Шунингдек, испаниялик теннисчи икки карра Олимпия чемпиони ҳисобланади. У 2008 йилда яккалик, 2016 йилда эса жуфтлик баҳсларида Олимпиада олтин медалини қўлга киритган.

Надаль профессионал фаолиятидаги сўнгги учрашувини 2024 йил ноябрь ойида Дэвис кубоги чорак финалида нидерландиялик Ботик ван де Зандсхулпга қарши ўтказган.