Зеленский тез орада Трамп билан учрашишини эълон қилди

Украина Президенти Владимир Зеленский тез орада Россия билан урушни якунлаш масаласида АҚШ Президенти Дональд Трамп билан учрашишини маълум қилди. Бу ҳақда у бугун, 26 декабрь куни ўзининг Telegram-каналида ёзди. 

“Бир кун ҳам йўқотмаяпмиз. Энг юқори даражада – Президент Трамп билан яқин вақт ичида учрашув бўйича келишиб олдик. Янги йилга қадар кўп нарса ҳал бўлиши мумкин”, деб ёзди у.

“Kyiv Post”нинг дипломатик манбаларига кўра, учрашув Трампнинг Флорида штатидаги Мар-а-Лаго номли шахсий қароргоҳида бўлиши кутилмоқда. Агар ҳаммаси режа бўйича кетса, учрашув жорий йилнинг 28 декабрь куни бўлиб ўтади.

Зеленский, шунингдек, Украина музокаралар делегацияси раҳбари Рустам Умаров АҚШ билан бўлиб ўтган сўнгги алоқалар натижалари ҳақида унга ҳисобот берганини билдирди. Яқинда у Флоридада Трампнинг махсус вакиллари Стив Уиткофф va Жаред Кушнер билан учрашган. Учрашувда АҚШ томонидан ишлаб чиқилган va кўплаб музокаралар натижасида ўзгартирилган тинчлик режаси тафсилотлари муҳокама қилинган. Кеча, 25 декабрь куни Зеленский Уиткофф va Кушнер билан телефон орқали гаплашиб, шундан сўнг “умумий натижа va узоқ муддатли тинчлик учун ишлаши мумкин бўлган яхши ғоялар бор”лигини билдирган.

Эслатиб ўтамиз, аввалроқ Зеленский 20 банддан иборат тинчлик режасининг мазмунини очиқлаганди.