Зеленский Путиннинг 9 май сулҳини рад этди

Украина Президенти Владимир Зеленский Россия Президенти Владимир Путин томонидан 7 майдан 11 майгача мўлжалланган уч кунлик оташкесим таклифини рад этди. Бу ҳақда “Интерфакс-Украина” хабар берди.

Зеленскийнинг айтишича, бу ташаббус Россиянинг халқаро изоляциядан чиқаётгандек кўринишини яратишга қаратилган “театр саҳнаси”.

Узоқ давом этмайдиган сулҳ таклифига жавобан Украина томони АҚШ томонидан илгари сурилган стратегияга мувофиқ 30 кунлик оташкесимни талаб қилмоқда.

“30 кунлик синов қилайлик. Нега айнан 30 кун? Чунки уч, беш ёки етти кунда ҳеч қандай жиддий масала бўйича келишиб бўлмайди”, деди Зеленский.

Шунингдек, у 9 май куни Москвадаги байрам тадбирларига ташриф буюрадиган давлат раҳбарлари хавфсизлиги учун Киев ҳеч қандай кафолат бермаслигини таъкидлаган.

Эслатиб ўтамиз, Владимир Путин 28 апрель куни 9 май муносабати билан оташкесим эълон қилган эди. Кремль баёнотида гуманитар сабабларга кўра, 7 май соат 00:00 дан 11 май соат 00:00 гача Россия томони оташкесим эълон қилиши, бу давр мобайнида барча жанговар ҳаракатлар тўхтатилиши айтилган.

Зеленский эса бу таклифни аввал бошиданоқ “манипуляция уринишлари” деб атаган.  

Россия раҳбари илгари ҳам Пасха байрами муносабати билан ҳам оташкесим эълон қилган бўлиб, ўшанда жанговар ҳаракатлар 19 апрель соат 18:00 дан 21 апрель соат 00:00 гача тўхтатилган эди. Зеленский дастлаб бунга қўшилмаган бўлса-да, орадан бир неча соат ўтиб розилик билдирган.