Зеленский президентликдан қачон кетишини айтди

Украина Президенти Владимир Зеленский Россия билан уруш тугаганидан кейин президентлик лавозимини тарк этишга тайёрлигини айтди. Шунингдек, у ўт очишни тўхтатиш режимига эришилса, Украинада сайловлар ўтказиш ташаббуси билан чиқишини билдирди. Президент бу ҳақда Американинг “The Axios Show” дастурига берган интервьюсида гапирди. 

“Уруш тугагач, ўз ишингизни тугалланган деб ҳисоблайсизми?”, деган саволга Зеленский истеъфога чиқишга “тайёр” эканини билдирди. 

“Менинг мақсадим – сайловда қатнашишни давом эттириш эмас, урушни тугатиш”, дейди у. 

Украина Президенти ўт очишни тўхтатиш даврида сайлов ўтказиш имконияти пайдо бўлиши мумкинлигини айтди. 

“Биз бу вақтдан фойдаланишимиз мумкин ва мен парламентга ишора қила оламан”, дея аниқлик киритди у сайловга тайёргарликни бошлаш ҳақида. 

Зеленскийнинг сўзларига кўра, у одамлар тинчликка эришиш учун зарур бўлган муҳим қарорларни қабул қилиш учун “янги мандатга эга бўлган раҳбарни” хоҳлашлари мумкинлигини тушунади. Бироқ Украина Президенти ҳарбий ҳаракатлар пайтида ўз лавозимини тарк этиши ёки янги сайловларда қатнашишдан бош тортиши мумкинлигини тўғридан тўғри айтмаган. 

Зеленский шунингдек, агар Россия урушни тугатмаса, унинг расмийлари “энг яқин бомба бошпанаси қаерда эканлигини билишлари керак”лигини айтди. 

Унинг таъкидлашича, Украина тинч аҳолини бомбаламайди. Бироқ, у Россия куч марказлари, жумладан, Кремль ҳам зарба зонасида бўлиши мумкинлигини яширмади. 

“Улар бомба бошпаналари қаерда эканлигини билишлари керак. Агар улар урушни тўхтатмасалар, барибир уларга керак бўлади. Биз Украинада ҳар куни жавоб беришимизни тушунишлари керак. Агар бизга ҳужум қилсалар, жавоб берамиз”, дейди Зеленский

Унинг таъкидлашича, у Россия нишонлари – энергетика инфратузилмаси ва мудофаа иншоотларига зарба беришда АҚШ Президенти Дональд Трампнинг аниқ ёрдамига эга. Зеленскийнинг қўшимча қилишича, агар Киев АҚШдан қўшимча узоқ масофали қурол олса, улардан фойдаланади. 

Украина етакчисининг айтишича, у Трамп билан учрашувида аниқ бир талабни қўйган: янги қурол тизими Россия Президенти Владимир Путинни музокаралар столига ўтиришга мажбур қилади. АҚШ Президенти бу борада ишлашга ваъда берган.