Етакчилар очко йўқотди: АПЛда 22-тур қандай ўтди? 

Кеча, 18 январь куни Англия Премьер-лигасининг 22-тури доирасидаги учрашувлар якунланди. Турнинг марказий баҳсида “Манчестер Сити” дербида “Манчестер Юнайтед”га имкониятни бой берди. Пешқадам “Арсенал” ва “Ливерпуль” жамоалари эса ўз учрашувларида дуранг натижа қайд этди.

“Манчестер Юнайтед”-“Манчестер Сити” – 2:0. Дербида “Манчестер Юнайтед” Каррик қўл остидаги илк ғалабасини нишонлади. Мезбонларга ғалаба тақдим этувчи голларга Бриан Мбемо ва Патрик Доргу муаллифлик қилди. “Сити” таркибида Абдуқодир Ҳусанов тўлиқ 90 дақиқа ҳаракат қилиб, ҳимоядаги энг яхши ўйинчилардан бири бўлди.

“Челси”-“Брентфорд” – 2:0. “Челси” ҳам янги мураббий қўл остида дастлабки 3 очкосини қўлга киритди. “Аристократлар” ўз майдонида Жоао Педро ва Палмернинг голлари эвазига ғалабани расмийлаштирди.

“Лидс Юнайтед”-“Фулҳэм” – 1:0. Ушбу ўйинда “Лидс Юнайтед” сўнгги дақиқадаги гол билан рақибдан устун келди. “Фулҳэм” ҳам гол уриш учун имкониятлар яратди, бироқ мезбонлар ҳимоясини енгиб ўта олмади.

“Ливерпуль”-“Бёрнли” – 1:1. “Ливерпуль” кўпроқ ҳужум қилган бўлса-да, “Бёрнли” ҳимоядаги муваффақиятли ҳаракатлари эвазига очко йўқотмади. Флориан Вирц гол урди, унга Маркус Эдвардс жавоб берди.

“Ноттингем Форест”-“Арсенал” – 0:0. Пешқадам “Арсенал” сафар ўйинда дуранг натижага рози бўлди. Таъқибчиларнинг очко йўқотиши туфайли “тўпчилар” кетма-кет икки дурангдан кейин ҳам етакчиликни сақлаб қолди.

“Сандерленд”-“Кристал Пэлас” – 2:1. Мезбон жамоа “Сандерленд” ўз мухлислари олдида “Кристал Пэлас”ни кичик ҳисоб билан мағлуб этди ва турнир жадвалида 9‑поғонага кўтарилди.

“Тоттенхэм”-“Вест Ҳэм” – 1:2. Кетма-кет 5 учрашувда ғалаба қозона олмай келаётган “Тоттенхэм” бу ўйинда ҳам муваффақиятсизликка учради. Лондонликлар сафарда “Вест Ҳэм”га 90+3 дақиқада ўтказиб юборилган гол эвазига мағлуб бўлди.

“Вулверхэмптон”-“Ньюкасл” – 0:0. Ҳар икки жамоа ҳимоявий ўйин кўрсатди. Якунда ҳар жамоа бир очкодан бўлишиб, дуранг натижага рози бўлди.

“Астон Вилла”-“Эвертон” – 0:1. Сўнгги турларда натижалар билан чемпионлик курашига қўшилган Унаи Эмери шогирдлари ўз майдонида “Эвертон”га кичик ҳисобда имкониятни бой берди.

“Брайтон”-“Борнмут”. Бу учрашув бугун, 19 январь куни кечқурун бўлиб ўтиши режалаштирилган.

Маълумот учун, айни пайтда турнир жадвалида Лондоннинг “Арсенал” жамоаси 50 очко билан пешқадамлик қилмоқда. “Манчестер Сити” 43 очко жамғарган ҳолда иккинчи ўринда бормоқда, “Астон Вилла” эса худди шу кўрсаткич билан учинчи поғонани эгаллаб турибди. Англия Премьер-лигасида навбатдаги тур учрашувлари жорий йилнинг 24 январь санасидан бошланади.