ЕИ россияликларга кўп марталик виза беришни тақиқлади

Россия фуқаролари эндиликда Шенген ҳудудига кириш учун ҳар сафар янги виза олиши керак бўлади. Бу ҳақда Еврокомиссия матбуот хизмати хабар берди.

Баёнотда айтилишича, бу қарор Украина билан уруш туфайли “россиялик аризачилар билан боғлиқ миграцион ва хавфсизлик хавфи сезиларли даражада ошгани” сабабли қабул қилинган.

Ҳужжат муаллифлари “Россиянинг миграцияни қурол сифатида қўллаётгани”, кибер ва саноат жосуслиги хавфи, шунингдек, визаларнинг Украинага қарши тарғибот мақсадида ноқонуний ишлатилиши мумкинлигини қайд этган.

“Россиялик виза аризачилари визани олишдан аввал янада синчков ва тез-тез текширувдан ўтишлари керак. Шу сабабли, уларга нисбатан 24-модда (2)-бандда кўрсатилган кўп марталик виза қоидаларидан анча қатъийроқ тартиблар қўлланади”, дейилади Еврокомиссия ҳужжатида.

Евроиттифоқ жорий йилнинг октябрь охирида жорий этилган 19-санкциялар пакетида россияликларга Шенген визаларини бериш тартибини кескинлаштирмаган, аммо бундай чора кўриб чиқилаётгани ҳақида ANSA, DPA ва “Politico” нашрлари хабар берган. Тўлиқ виза тақиқи эса ҳозирча режалаштирилмаяпти.

Эслатиб ўтамиз, аввалроқ Европа Иттифоқи Россия фуқароларига кўп марталик Шенген визаларини беришни деярли тўлиқ тўхтатишга тайёргарлик кўраётгани ҳақида хабар берилган эди.