“Ярамас”. Лукашенко Украинани айблади 

Беларусь қўшинлари Россиянинг Украина шарқида , Донбассда бошлаган “махсус операцияси”да иштирок этмаяпти. Бу ҳақда Беларусь фуқароси Александр Лукашенко маълум қилди. 

“Мана мени ўқиганим: “Тахминан эрталаб соат 5:00 да Украинанинг Россия ва Беларусь ҳудудидаги давлат чегараси Беларусь томонидан қўллаб-қувватланган рус қўшинлари томонидан ҳужумга учради.” Ярамаслар, бизнинг ҳеч қандай қўшинимиз бу операцияда иштирок этмайди”, деган у ҳарбийлар билан бўлиб ўтган тезкор йиғилишда. 

Россия билан алоқа 

Лукашенконинг хабар беришича, Беларусь Мудофаа вазирлиги раҳбарияти Украина ҳарбий раҳбарларига Россия Қуролли Кучларининг Донбассдаги операцияси бошланишидан олдин Россия ҳарбий раҳбарияти билан боғланишни таклиф қилган. Унинг айтишича, кеча, 23 февраль куни кечқурун Украина ҳарбий раҳбарияти вакили Минск билан боғланган. Лукашенко номидан Беларусь Мудофаа вазири Украина вакили билан суҳбатлашган. 

“Сиз (Беларусь Мудофаа вазири) менинг номимдан унга таклиф қилдингизки, Президент Путин билан учрашувдан сўнг, бизнинг Президентимиз бу қирғин бошланмаслиги учун зудлик билан Россия Мудофаа вазири, Бош штаби билан боғланишингизни тавсия қилади. У қўнғироқ қилдими? Қилмади”, деган Лукашенко. 

Унга кўра, Украина Мудофаа вазирлиги вакили можаро бошланиши мумкинлигини билиб ҳам, Москвага қўнғироқ қилмаган.  

“Эшитинг, тарихда Хрушев кечаси Кеннедига қўнғироқ қилиб, термоядро урушини тўхтатган ҳолатлар бўлган. Мана, кўрдингизми, қўнғироқ қилиш, телефон гўшагини олиш қийин эди. Ярамас”, дея хулоса қилган Лукашенко.

Аввалроқ, Россия Президенти Владимир Путин Украина шарқида Донбассда рус ҳарбийлари махсус ҳарбий операция бошлаганини эълон қилганди. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади. 

Украина ИИВ маслаҳатчиси эса Киев ва Харьковга ракета ҳужуми уюштирилганини маълум қилди. Президент Зеленский мамлакатда ҳарбий ҳолат эълон қилди. 

Эслатиб ўтамиз, 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. 

Путиннинг фавқулодда қарори ортидан АҚШ Президенти Жо Байден айрим шахсларнинг мулкини блоклаш ва айрим операцияларни тақиқловчи фармон қабул қилди. Ҳужжат ДХР ва ЛХРга сармоя киритишни, шунингдек, ушбу минтақалардан ҳар қандай товарлар, хизматлар ёки технологияларни Қўшма Штатларга импорт қилишни тақиқлайди. 

Бундан ташқари, ушбу фармон ўзини мустақил деб эълон қилган республикаларда ҳаракат қилишга қарор қилган ҳар қандай шахсга нисбатан жазо чораларини қўллаш имконини беради. 

Қўшма Штатларда жойлашган ёки кейинчалик АҚШга кирадиган, ДХР ва ЛХР билан боғлиқ шахсларга тегишли бўлган барча мулк ва мулкдаги улушлар блокланади. 

Шунингдек, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.