Яман катта уруш бўсағасида: ҳусийларга қарши йирик операция бошланди

Яманнинг халқаро миқёсда тан олинган Президентлик раҳбарлик кенгаши раҳбари Рашад ал-Алимий ҳусийларга қарши катта операция бошланганини эълон қилди. Ушбу операцияда 100 мингдан ортиқ ҳарбий қатнашиши мумкин. Унинг баёноти кеча, 4 октябрь куни Президентлик раҳбарлик кенгаши сайтида эълон қилинди.

Ал-Алимийнинг сўзларига кўра, эскалацияни пасайтириш имконияи тугаганидан сўнг “тайёргарлик босқичидан” ҳарбий операцияга ўтилган. У, шунингдек, қуролини топширган ҳусий жангчиларига авф эълон қилишга ваъда берган ҳамда ҳаракат назоратидаги ҳудудлар аҳолисини ҳукумат қўшинлари билан ҳамкорлик қилишга чақирган. Операция якунлангунига қадар барча ҳарбий, куч ва фуқаролик давлат тузилмалари пўлатдек жанговар шайлик ҳолатига ўтказилган.

Ал-Алимийнинг баёнотидан икки кун олдин “Reuters” минтақавий ва ғарбдаги олтита манбага таяниб, Саудия Арабистони ҳусийларга қарши ҳужумга тайёргарлик кўраётгани ҳақида хабар берган. Иккита вариант кўриб чиқилган: Боб ал-Мандоб бўғози ҳудудини қайтариб олиш бўйича чекланган операция ёки бир вақтнинг ўзида Ал-Байда, Мариб, Таиз ва Ал-Жауф провинцияларида анча кенг кўламли ҳужум уюштириш.

Нашрнинг қайд этишича, танланган вариантга қараб операцияга 100 мингдан ортиқ Яман ҳарбийлари жалб этилиши мумкин. Қуруқликдаги ҳужумни Ар-Риёд томонидан қўллаб-қувватланадиган Яман тузилмалари олиб бориши, Саудия Арабистони эса ҳаво зарбаларини бериши керак.

Манбалардан бирининг сўзларига кўра, АҚШ Ар-Риёдга разведка маълумотлари ва нишонларни танлаш учун маълумотларни тақдим этмоқда. Бироқ АҚШ Президенти Дональд Трамп илгарироқ валиаҳд шаҳзода Муҳаммад бин Салмоннинг ҳусийларга бериладиган зарбаларда Америка авиациясининг бевосита иштирок этиши ҳақидаги илтимосини рад этган. Покистон ҳарбий мутахассислар ва асбоб-ускуналарни юборган, Саудия Арабистони эса Яманда илгари сотиб олинган Туркия дронларидан фойдаланмоқда.

“The Insider” ҳисоб-китобларига кўра, жорий йил 10-11 сентябрь кунларининг ўзида ҳусийлар Ғарбий Соҳилда ва бевосита Боб ал-Мандоб бўғози ёнида камида тўртта муҳим пунктни эгаллаб олган. 10 сентябрь куни улар йирик Моха портини ва Ханиш оролларини эгаллаган. Эртаси куни гуруҳ бевосита Боб ал-Мандоб қирғоғида жойлашган Дхубаб шаҳрини ва унинг рўпарасидаги Перим оролини эгаллаб олган. Шундан сўнг “Reuters” ҳусийлар Яманнинг Қизил денгиз соҳили устидан назоратни қўлга киритгани ҳақида хабар берди.

Эслатиб ўтамиз, аввалроқ Яман Вакиллар палатаси онлайн мажлисда Яман Президентлик кенгаши етакчиси Рашад ал-Алими томонидан ҳусийларга қарши туриш учун умумий сафарбарлик эълон қилиш бўйича киритилган илтимосномани маъқуллагани ҳақида хабар берилган эди.