Венгриянинг янги Бош вазири Президентга таҳдид қилди

Венгриянинг янги сайланган Бош вазири Петер Мадьяр парламентда мамлакат Президентига нисбатан импичмент (лавозимидан четлатиш) жараёнини бошлаш ниятида эканини маълум қилди. Бу ҳақда у бугун, 1 июнь куни журналистлар билан мутбуот анжуманида сўз очди.

Бош вазир Петер Мадьяр агар Венгрия Президенти Тамаш Шуйок ўз хоҳиши билан лавозимини тарк этишдан бош тортса, парламентда унга нисбатан импичмент жараёнини ташаббус қилишини айтган.

“Мен республика Президентига шуни маълум қилдимки, агар у ўз позициясини ўзгартирмаса ва ўз хоҳиши билан истеъфога чиқмаса, унда мен бугун ҳукмрон “Тиса” партияси фракциясини бизнинг таклифларимиздан хабардор қиламан ва биз зудлик билан парламентда зарур жараёнларни бошлаймиз. Мен, шунингдек, Президентга Асосий қонунга (Конституцияга) мувофиқ, уни ваколатларидан маҳрум қилишнинг бир нечта вариантлари мавжудлигини айтдим”, дейди Мадьяр.

Бош вазирнинг айтишича, агар зарурат туғилса, “Тиса” фракцияси Шуйокни истеъфога чиқариш учун парламентга Асосий қонунга ўзгартиришлар киритиш бўйича таклифларни тақдим этади.

Хабар қилинишича, аввалроқ Мадьяр Венгрия Президенти давлат раҳбари сифатидаги ўз вазифаларини уддалай олмаганликда ва ўтган йиллар давомида Виктор Орбаннинг собиқ ҳукумати томонидан содир этилганлиги даъво қилинаётган суиистеъмолликларга тўсқинлик қилмаганликда айблаган. Тамаш Шуйок эса Мадьярнинг талаби билан истеъфога чиқишдан бош тортган ва ўз вазифаларини бажаришда давом этишини маълум қилган.

Эслатиб ўтамиз, жорий йилнинг 12 апрель куни Венгрияда парламент сайловлари бўлиб ўтган эди. Унда мухолифат етакчиси, 45 ёшли Петер Мадьяр ва унинг ўнг-марказчи “Тиса” партияси ғалаба қозонган.