Венгрияда Ўзбекистон элчихонаси очилди

Кеча, 27 март куни Венгрия пойтахти Будапештда Ўзбекистон элчихонаси очилди. Бу ҳақда Ўзбекистон Ташқи ишлар вазирлиги матбуот хизмати хабар берди.

Қайд этилишича, очилиш маросимида Ўзбекистон Ташқи ишлар вазири вазифасини бажарувчи Бахтиёр Саидов, Венгрия Ташқи ишлар ва савдо вазири Петер Сийярто, Иқтисодий ривожланиш вазири Мартон Надь, шунингдек, кенг жамоатчилик вакиллари, сиёсий ва ишбилармон доиралар ҳамда маҳаллий ОАВ ходимлари иштирок этган.

Тадбирда сўзга чиққан Бахтиёр Саидов Ўзбекистон очиқ, прагматик, тинчликсевар ташқи сиёсат юритаётгани, барча давлатлар билан ўзаро манфаатли алоқалар ривожланиб бораётгани, хусусан, Венгрия билан ҳамкорликни кенгайтириш Ўзбекистон ташқи сиёсатининг муҳим йўналишларидан бири эканини таъкидлаган.

Унинг мавқедоши Петер Сийярто ҳам Ўзбекистон элчихонасининг очилиши икки мамлакатлар ўртасидаги алоқаларда кузатилаётган ижобий ўсиш суръатининг тасдиғи эканини таъкидлаган. Шунингдек, у элчихона фаолияти Ўзбекистон-Венгрия муносабатларини кенгайтириш ва бойитишга хизмат қилишига ишонч билдирган.

Элчихона очилиши олдидан Ўзбекистон ва Венгрия Ташқи ишлар вазирлари ўртасида музокаралар ҳам бўлиб ўтган. Унда икки давлат ўртасидаги турли соҳалардаги муносабатларни ривожлантириш масалалари муҳокама қилинган. Учрашув якунлари бўйича маданий мерос соҳасидаги икки томонлама ҳамкорлик тўғрисидаги англашув меморандуми имзоланган.

Маълумот учун, Венгриянинг Ўзбекистондаги элчихонаси 2016 йилда очилган.