Вьетнамда сайёҳлар кетаётган катер ағдарилиб, 15 киши ҳалок бўлди (видео)

Бугун, 11 июль куни Вьетнамнинг жанубидаги Фукуок ороли яқинида ҳиндистонлик сайёҳлар кетаётган катер ағдарилиб кетиши оқибатида 15 киши ҳалок бўлди. Бу ҳақда “Al Jazeera” хабар берди.

Маълум қилинишича, катер бортида 32 нафар Ҳиндистон фуқароси ва 4 нафар экипаж аъзоси бўлган. Ҳодиса оқибатида 21 киши қутқарилган, жароҳатланганлар шифохонага ётқизилган.

Дастлабки маълумотларга кўра, катер машҳур Хон Мэй Рут Нгоай оролидан Ан Тхой халқаро портига қайтаётган вақтда, қирғоқдан тахминан 400 метр узоқликда ағдарилиб кетган. Ҳодиса сабаби ҳозирча аниқланмаган.

Гувоҳларнинг айтишича, воқеа жойига яқин атрофдаги кемалар биринчи бўлиб етиб бориб, йўловчиларни қутқаришга киришган. Кейинчалик Вьетнам чегара хизмати, ҳарбий-денгиз кучлари ва соҳил қўриқлаш хизмати қутқарув ишларига жалб қилинган. Айрим йўловчилар катер ичида қолиб кетгани сабаб қутқарув ишлари мураккаблашган.

Ҳиндистоннинг Ханойдаги элчихонаси жабрланганларнинг яқинлари билан ишлаш учун Ханой ва Хошимин шаҳарларида тезкор штаблар ташкил этилганини маълум қилган.

Эслатиб ўтамиз, аввалроқ АҚШнинг Висконсин штатидаги Женева кўлида кучли бўрон вақтида қайиқ ағдарилиб кетиши оқибатида уч киши ҳалок бўлиб, етти киши қутқариб қолинган эди.