Ўзбекистонни босиб олишни таклиф қилган Прилепин Зеленскийни суиқасд уюштиришда айблади

Россиядаги “Справедливая Россия – за правду” партияси ҳамраиси, Росгвардия подполковниги, ёзувчи Захар Прилепин 2023 йилда ўзига нисбатан уюштирилган суиқасд шахсан Украина Президенти Владимир Зеленскийнинг буйруғи билан амалга оширилганини айтди. У бу фикрини ёзувчининг 50 йиллиги муносабати билан суратга олинган “Янги медиа устахонаси” фильмидаги фикларига таяниб, ТАСС хабар берди.

“Ва, албатта, менда у (Владимир Зеленский) билан шахсий ҳисоб-китобим бор, чунки шахсан у энг яқин дўстларимни ва мени ўлдиришга буйруқ берган, менинг ўлдирилишимни шахсан қонунийлаштирган”, дейди у.

Маълумот учун, 2023 йил май ойида Нижний Новгород вилоятининг Пионерский қишлоғида Прилепин миниб кетаётган машина портлатилган. Портлашда Украинага босқин бошланишидан олдин ва кейин, шу жумладан Росгвардия “Оплот” батальони таркибида у билан бирга хизмат қилган ёзувчининг ўртоғи Александр Шубин ҳалок бўлди. Прилепин эса яраланган. Тергов қўмитаси Прилепинга машинасини қайтариб берган. Прилепиннинг таъкидлашича, агар рулманлар билан тўлдирилган танкга қарши мина портласа, омон қолиш имконияти деярли йўқ.
2023 йил 6 июнь куни Россия Президенти Владимир Путин Прилепинни “Жасорат” ордени билан тақдирлади. Шубин ҳам вафотидан кейин “Жасорат” ордени билан тақдирланган.

Эслатиб ўтамиз, Захар Прилепин 2023 йил 20 декабрь куни “Россия Сегодня” халқаро мультимедиа матбуот марказида бўлиб ўтган матбуот анжуманида собиқ СССР ҳудудларини, жумладан Ўзбекистонни Россия Федерацияси таркибига қўшиб, уларнинг аҳолисига рус тилини ўргатиш таклифини илгари сурганди.

Бу Ўзбекистонда норозилик ва кенг мунозараларга сабаб бўлди. Ўзбекистонлик фаоллар ва депутатлар бу борада ўз муносабатларини эълон қилди. Хусусан, Олий Мажлис Қонунчилик палатаси депутати Иномжон Қудратов Прилепиннинг баёнотига муносабат билдираётиб, “Ақлсиз дўст ақлли душмандан ёмонроқдир”, нақлини эслатди. Табиат ресурслари вазирининг маслаҳатчиси, жамоатчилик фаоли Расул Кушербоев эса Ўзбекистон Ташқи ишлар вазирлиги ҳам мазкур вазиятдан норозилик билдириб, Россияга расмий нота юбориши кераклигини таъкидлади.

“Миллий тикланиш” демократик партияси Марказий кенгаши раиси ўринбосари Миродил Абдураҳмонов ҳам бу бўйича муносабат бериб, Киевни эгаллаш Россия учун орзулигича қолишини айтди. “Юксалиш” умуммиллий ҳаракати раиси, Олий Мажлис депутати Бобур Бекмуродов эса Прилепиннинг бундай ҳаракати на Ўзбекистон, на Россия қонунчилигига тўғри келишини эслатди. Яна бир  депутат Умида Раҳмонова эса бир давлатнинг суверенитет ҳуқуқини бошқа давлатларга нисбатан бузишни ғирт иккиюзламачилик деб атади.

Жамоатчилик орасидаги норозиликлардан сўнг, Россиянинг Ўзбекистондаги Фавқулодда ва мухтор элчиси Олег Мальгинов 21 декабрь куни Ўзбекистон Ташқи ишлар вазирлигига чақиртирилди. Учрашувда Россия вакилига “Россия сегодня” матбуот-марказида бўлиб ўтган анжуманда “Справедливая Россия – за правду” партияси ҳамраиси Захар Прилепиннинг Ўзбекистон ҳудудини Россияга қўшиб олиш зарурлиги ҳақидаги таклифи Тошкентда чуқур ташвиш ҳисси билан қабул қилингани қатъий тарзда етказилган.

Россия Ташқи ишлар вазирлиги расмий вакили Мария Захарова эса Захар Прилепиннинг Ўзбекистонни босиб олиш ҳақидаги тажовузкор гапларига муносабат билдириб, бу Прилепин шахсий фикри эканини, Москва билан боғлиқлик жойи йўқлигини айтди.