Ўзбекистонлик эркак АҚШдаги энг хавфли жиноятчилардан деб топилди

АҚШда Ўзбекистон фуқароси Сардор Тиркашев қўлга олинди. Оқ уй уни жиноий ўтмишга эга ноқонуний мигрантлар орасида мамлакатдаги энг хавфли жиноятчилардан бири деб атади. Бу ҳақда “Slavic Sacramento” нашри хабар берди.

Нашрнинг ёзишича, Тиркашев жорий йилнинг 7 октябрь куни Огайо штатининг Чилликоте шаҳрида АҚШ Иммиграция ва божхона назорати хизмати (ИБНХ) ходимлари томонидан қўлга олинган. Оқ уйнинг ижтимоий тармоқдаги баёнотида у бошқа қўлга олинган мигрантлар билан бирга тилга олинган.

Маълумотларга кўра, Тиркашев аввал оғирлаштирувчи ҳолатларда содир этилган икки марта тажовуз ва талончилик учун судланган.

Оқ уй баёнотида Жо Байден маъмурияти даврида жиноий ўтмишга эга ноқонуний мигрантларнинг мамлакатга киришига йўл қўйилгани таъкидланган. Дональд Трамп маъмурияти эса чегарани ёпиб, энг хавфли жиноятчиларни кўчалардан олиб ташлаётгани айтилган.

Кеча, 28 октябрь куни АҚШ Ички хавфсизлик департаменти (ИХД) ҳам Огайо штатида жиноий ўтмишга эга ноқонуний мигрантлар қўлга олингани ҳақида маълумот берган. Идора уларнинг аввалги жиноятлари қаторида жинсий жиноятлар, бўғиш, маст ҳолда автомобиль бошқариш ва кокаин савдосини санаб ўтган.

ИХД раҳбари Марквейн Маллин жиноий ўтмишга эга ноқонуний мигрантларни қўлга олиш ва депортация қилиш давом эттирилишини билдирган.

“Slavic Sacramento” нашри Тиркашевнинг қўлга олингани ҳақида Огайо штати ҳуқуқни муҳофаза қилувчи органларидан маълумот топган, бироқ ICE хизматидан бевосита тасдиқ ололмаганини қайд этган.

Эслатиб ўтамиз, аввалроқ ўзбекистонлик эркак АҚШда 12 млн долларлик юкни ўғирлаганликда айбланаётгани ҳақида хабар берилган эди.