Ўзбекистон яна Эрон билан ўйнайди

Ўзбекистон миллий терма жамоаси жорий йилнинг сентябрь-октябрь ойларидаги FIFA кунлари доирасида Эрон терма жамоасига қарши ўртоқлик учрашувларида майдонга тушади. Бу ҳақда Эрон футбол федерацияси президенти Меҳди Тож маълум қилди.

Федерация раҳбарининг сўзларига кўра, Ўзбекистонга қарши баҳсни Тошкентда ўтказиш режалаштирилмоқда.

“Жорий йилнинг 21 сентябрдан 6 октябргача FIFA кунлари бўлиб ўтади. Ушбу даврда 3 та ўйинда иштирок этамиз. Ҳозирча Ўзбекистон ва Россия билан ўйнашимиз аниқ. 3 та учрашувимиз 3 хил мамлакатда бўлиб ўтади. Кейинги FIFA кунларида Ироққа бориб, у ердаги турнирда иштирок этамиз”, деган Меҳди Тож.

Аввалроқ, Ўзбекистон миллий терма жамоаси бош мураббийи Фабио Каннаваро ҳам жаҳон чемпионатига бағишланган матбуот анжуманида Эрон терма жамоаси билан ўртоқлик учрашуви ўтказиш бўйича музокаралар давом этаётганини маълум қилган эди.

Маълумот учун, Ўзбекистон миллий терма жамоаси Эрон билан сўнги 3 йилда 7 марта тўқнаш келган. Шуларнинг 2 тасида Ўзбекистон ғалаба қозонган, Эрон эса 1 та учрашувда зафар қучган бўлса, қолган учрашувларда дуранг қайд этилган.

Эслатиб ўтамиз, аввалроқ жорий йилнинг октябрь ойида Ўзбекистон миллий терма жамоаси Жанубий Корея билан ҳам ўртоқлик учрашуви ўтказиши ҳақида хабар берилганди.